ഗാന്ധിനഗര്: പുതിക്കിയ മോട്ടോര് വാഹന ആക്ടില് മാറ്റങ്ങള്വരുത്തി ഗുജറാത്ത് സര്ക്കാര്. പുതിയ മോട്ടോര് വാഹന നിയമ പ്രകാരം വിവിധ നിയമ ലംഘനങ്ങള്ക്ക് ഏര്പ്പെടുത്തിയ പിഴയിലാണ് ബി.ജെ.പി ഭരിക്കുന്ന ഗുജറാത്ത് സര്ക്കാര് കുറവ് പ്രഖ്യാപിച്ചത്. നിലവില് കേന്ദ്ര നിയമ പ്രകാരം ഏര്പ്പെടുത്തിയ പിഴകളില് ചിലതില് 50 ശതമാനം വരെയാണ് കുറവ് വരുത്തിയിരിക്കുന്നത്.
ഇതോടെ ഹെല്മറ്റ് ഇല്ലാതെ വാഹനം ഓടിച്ചാല് ഉള്ള പിഴ 1000 എന്നതില് നിന്നും 500 ആയി ചുരുക്കി. ബൈക്കില് മൂന്ന് പേര് സഞ്ചരിച്ചാലുള്ള 1000 രൂപ പിഴ 100 ആക്കി. സീറ്റ് ബെല്ട്ട് ധരിക്കാതെ വാഹനം ഓടിച്ചാലുള്ള പിഴ 1000ത്തില് നിന്നും 500 ആക്കി. ലൈസന്സ് ഇല്ലാതെ വാഹനം ഓടിച്ചാല് 5000 രൂപ പിഴയുള്ളത് 3000 ആയി കുറച്ചു. ഇത്തരത്തില് ഒട്ടുമിക്ക പിഴകളിലും ഗുജറാത്ത് സര്ക്കാര് കുറവ് പ്രഖ്യാപിച്ചിട്ടുണ്ട്.
സെപ്തംബര് 1 മുതലാണ് പരിഷ്കരിച്ച ട്രാഫിക് നിയനം രാജ്യത്ത് നിലവില് വന്നത്. എന്നാല് പഞ്ചാബ് അടക്കമുള്ള ചില സംസ്ഥാനങ്ങള് ഇത് നടപ്പിലാക്കാന് വിസമ്മതിച്ചു. കേരളത്തിലെ സര്ക്കാര് പോലും നടപ്പിലാക്കിയതിന് പിന്നാലെ പുനപരിശോധന നടത്താന് ഒരുങ്ങുന്നതിനിടെയാണ് കേന്ദ്രനിയമത്തില് ബി.ജെ.പി ഭരിക്കുന്ന സംസ്ഥാന സര്ക്കാര് മാറ്റം വരുത്തിയിരിക്കുന്നത്.
