ന്യൂഡല്ഹി: മോട്ടോര് വാഹന നിയമത്തിലെ ഭേദഗതിക്കുശേഷം ഗതാഗത നിയമ ലംഘനത്തിന്റെ പേരില് ചുമത്തുന്ന പിഴത്തുകയില് റെക്കോര്ഡുമായി ഡല്ഹി ട്രാഫിക് പോലീസ്. രാജസ്ഥാന് രജിസ്ട്രേഷനിലുള്ള ട്രക്കിന്റെ നിയമലംഘനത്തിന് ചുമത്തിയത് 1.47 ലക്ഷം രൂപ.
ഡല്ഹിയിലെ രോഹിണി സര്ക്കിള് പോലീസ് ആണ് 1,47,100 രൂപ പിഴയിട്ട് റെക്കോര്ഡ് നേട്ടമുണ്ടാക്കിയത്. പുതിയ നിയമം നിലവില് വന്നതിനു ശേഷമുള്ള ഏറ്റവും വലിയ പിഴത്തുകയാണിത്. ഭഗവാന് റാം എന്നയാള്ക്കാണ് പിഴയിട്ടിരിക്കുന്നത്. ടാറ്റ 4018.എസ് ഹെവി ഡ്യൂട്ടി ട്രക്കാണ് വാഹനം. രാജസ്ഥാനിലെ ബികാനെര് ആര്.ടി.ഒയില് രജിസ്റ്റര് ചെയ്തിരിക്കുന്ന വാഹനമാണിത്.
മുന്പ്, നാഗാലാന്ഡ് രജിസ്ട്രേഷനിലുള്ള ട്രക്കിന്റെ ഡ്രൈവര്ക്ക് 86,500 രൂപ പിഴയിട്ടതായിരുന്നു ഇതുവരെയുള്ള ഉയര്ന്ന തുക. ഒഡീഷയിലെ സാംബല്പുര് ജില്ല ആര്.ടി.ഒ ആയിരുന്നു ഈ നടപടി സ്വീകരിച്ചത്. അംഗീകാരമില്ലാത്ത ആളെ വാഹനം ഓടിക്കാന് അനുവദിച്ചതിന് 5,000 രൂപ, ലൈസന്സ് ഇല്ലാതെ വാഹനമോടിച്ചതിന് 5,000 രൂപ, അമിത ഭാരം കയറ്റിയതിന് 56,000 രൂപ, അപകടകരമായ വിധത്തില് പുറത്തേക്ക് തള്ളിനില്ക്കുന്ന വിധത്തില് ലോഡ് കയറ്റിയതിന് 20,000 രൂപ, മറ്റ് ചെറിയ നിയമലംഘനങ്ങള്ക്ക് 500 രൂപ എന്നിങ്ങനെയായിരുന്നു പിഴ ചുമത്തിയത്. ഉദ്യോഗസ്ഥരുമായി നടത്തിയ ചര്ച്ചയ്ക്കുശേഷം ഡ്രൈവര് 70,000 രൂപ അടച്ചു.
പുതിയ നിയമം നിലവില് വന്ന് നാലു ദിവസത്തിനുള്ളില് 88 ലക്ഷം രൂപയാണ് ഒഡീഷ ഗതാഗത വകുപ്പ് പിഴയായി പിരിച്ചെടുത്തത്. ലൈസന്സും രജിസ്ട്രേഷന് രേഖയും ഇന്ഷുറന്സും ഇല്ലാതെ മദ്യലഹരിയില് ഓട്ടോറിക്ഷ ഓടിച്ചയാളില് നിന്നും 47,500 രൂപയാണ് ഈടാക്കിയത്.
