തിരുവല്ല: മലങ്കര മാര്ത്തോമ്മ സുറിയാനി സഭയില് പുതിയ നാല് എപ്പിസ്കോപ്പമാരെ തെരഞ്ഞെടുക്കുന്നതിനുള്ള സ്പെഷ്യല് മണ്ഡലം തീരുമാനമാകാതെ അവസാനിച്ചു. ഹൈക്കോടതി അനുമതിയോടെ ഇന്നലെ മുതല് നടന്നുവന്ന സ്പെഷ്യല് മണ്ഡലമാണ് ഇന്ന് ഉച്ചയോടെ സമാപിച്ചത്. എന്നാല് മണ്ഡലവുമായി ബന്ധപ്പെട്ട മറ്റു ചര്ച്ചകള് തുടരും.
സഭയിലേക്ക് പുതിയ നാല് എപ്പിസ്കോപ്പമാരെ തെരഞ്ഞെടുക്കുന്നതിനാണ് സ്പെഷ്യല് മണ്ഡലം ചേര്ന്നത്. ഇന്നലെ നടന്ന തെരഞ്ഞെടുപ്പില് നാലു പേര്ക്കും വിജയിക്കാന് ആവശ്യമായ ഭൂരിപക്ഷം ലഭിച്ചിരുന്നില്ല. ഇന്ന് വീണ്ടും തെരഞ്ഞെടുപ്പ് നടന്നെങ്കിലും ഇന്നലെ ലഭിച്ച വോട്ട് പോലും ആര്ക്കും കിട്ടിയില്ല. തെരഞ്ഞെടുപ്പില് പങ്കാളികളായ അത്മായര് കരുത്തു തെളിയിച്ചതോടെയാണ് സഭാ നേതൃത്വത്തിന് ആരെയും തെരഞ്ഞെടുക്കാന് കഴിയാതെ വന്നത്.
ഇന്നു നടന്ന തെരഞ്ഞെടുപ്പില് റവ.ഡോ. പി.ജി ജോര്ജിന് വൈദികപക്ഷത്തുനിന്നും 30.45% വോട്ടും അത്മായ പക്ഷത്തുനിന്ന് 45.25% വോട്ടുകളും ലഭിച്ചു. റവ. സാജു സി.പാപ്പച്ചന് 38.18%-53.69%, റവ.ഡോ. ജോസഫ് ദാനിയേല് 53.18%-71.20%, റവ.ഡോ.മോത്തി വര്ക്കി 51.82%-70-58% എന്നിങ്ങനെയാണ് വൈദിക പക്ഷത്തുനിന്നും അത്മായ പക്ഷത്തുനിന്നും ലഭിച്ച വോട്ടുകള്. ആകെ പോള് ചെയ്യുന്ന വോട്ടുകളില് ഇരുപക്ഷത്തിന്നും 75% വോട്ടുകള് ലഭിക്കുന്നവരാണ് വിജയികളാകുന്നത്.
സഭാ ചരിത്രത്തില് ഇതാദ്യമായാണ് രണ്ടു തവണ തെരഞ്ഞെടുപ്പ് നടത്തിയിട്ടും ആര്ക്കും ഭൂരിപക്ഷം ലഭിക്കാതെ അനിശ്ചിതത്വം നേരിടുന്നത്.
