ഹൂഗ്ലി : ചന്ദ്രയാന്-2 ന്റെ ഡെപ്യൂട്ടി പ്രോജക്ട് ഡയറക്ടറുടെ നാട്ടില് പ്രേതത്തെ ഭയന്ന് സ്കൂളില് പോകാതെ വിദ്യാര്ത്ഥികള്. പശ്ചിമ ബംഗാളിലെ ഹൂഗ്ലിയിലെ ശ്രീ അരബിന്ദോ വിദ്യാമന്ദിര് ഇംഗ്ലിഷ് മീഡിയം സ്കൂളിലാണ് പ്രേതബാധയുള്ളതായി വാര്ത്തകള് പ്രചരിച്ചത്. ഇതോടെ വിദ്യാര്ത്ഥികള് സ്കൂളിലേയ്ക്ക് എത്താതായി. ആകെ 15 കുട്ടികളാണ് ഇന്നലെ സ്കൂളിലെത്തിയത്.
2001 ല് ഐഎസ്ആര്ഒയില് ചേര്ന്ന് ആന്റിന സിസ്റ്റംസ്, ചന്ദ്രയാന്-1 ജിസാറ്റ് 12 ആസ്ട്രോസാറ്റ് എന്നിവയില് സേവനം ചെയ്തിട്ടുള്ള ചന്ദ്രകാന്ത കുമാറിന്റെ നാടായ ഹൂഗ്ലിയില് നിന്നുള്ളതാണ് വാര്ത്ത.
സ്കൂളില് നിന്ന് പേടിപ്പെടുത്തുന്ന തരത്തില് സ്ത്രീയുടെ ശബ്ദം കേള്ക്കുന്നുവെന്നാണ് വിദ്യാര്ത്ഥികള് പറയുന്നത്. സ്കൂളിന് അടുത്തുള്ള വീട്ടില് വര്ഷങ്ങള്ക്ക് മുന്പ് ജീവനൊടുക്കിയ സ്ത്രീയുടെയും അപകടത്തില് മരിച്ച സ്കൂളിലെ വിദ്യാര്ത്ഥിനിയുടെയും ശബ്ദമാണ് കേള്ക്കുന്നതെന്നാണ് വിദ്യാര്ത്ഥികള് ആരോപിക്കുന്നത്.
