ന്യൂഡല്ഹി: കഴിഞ്ഞ ദിവസം 69 ാം പിറന്നാള് ആഘോഷിച്ച പ്രധാനമന്ത്രി നരേന്ദ്രമോഡി അധികാരത്തില് കടിച്ചുതൂങ്ങി കിടക്കില്ലെന്നും പത്തു വര്ഷം കൂടി കഴിഞ്ഞാല് രാഷ്ട്രീയം വിടുമെന്നും മുതിര്ന്ന പത്രപ്രവര്ത്തകന്. 2029 ഓടെ രാഷ്ട്രീയം മതിയാക്കുന്ന അദ്ദേഹം അധികാര കസേര വിട്ടാല് ഹിമാലയത്തില് തപസ് അനുഷ്ഠിക്കാനായി പോയേക്കാമെന്ന് എഴുത്തുകാരനും മാധ്യമപ്രവര്ത്തകനുമായ ഹാസ് മര്ച്ചെന്റാണ് അഭിപ്രായപ്പെടുന്നത്.
ഇന്ത്യാ ടുഡേ ചാനലിലെ ഒരു ഷോയിലായിരുന്നു ഹാസ് മര്ച്ചെന്റ് ഇക്കാര്യം പറഞ്ഞത്. സന്യാസ ജീവിതം നയിക്കാനാണ് അദ്ദേഹം കൂടുതല് ഇഷ്ടപ്പെടുന്നത്. അധികാരത്തില് കടിച്ചുതൂങ്ങാന് അദ്ദേഹം ആഗ്രഹിക്കുന്നില്ല. 18 ാം വയസ്സില് ഹിമാലയത്തിലേക്ക് പോയ അദ്ദേഹം പതിനൊന്നു വര്ഷത്തിന് ശേഷം 80 ാം വയസ്സിലും ഹിമാലയം ലക്ഷ്യമാക്കി പോകും. 11 വര്ഷത്തിനുള്ളില് തന്നെ അദ്ദേഹം രാഷ്ട്രീയ ജീവിതം അവസാനിപ്പിക്കും. പിന്നീടുള്ള കാലം ഹിമാലയത്തില് സന്യാസജീവിതം നയിക്കും. ഹാസ് മര്ച്ചന്റ് പറയുന്നു.
അടുത്ത ലോക്സഭാ തെരഞ്ഞടുപ്പില് കൂടി പ്രധാനമന്ത്രിയായാല് 2029 ലെ തിരഞ്ഞെടുപ്പിന് മുമ്പ് അദ്ദേഹം മാറിനില്ക്കും. ചൊവ്വാഴ്ചയായിരുന്നു നരേന്ദ്രമോദിയുടെ 69ാം ജന്മദിനം. ഗുജറാത്തിലെ ഗാന്ധിനഗറിലെ വീട്ടില് അമ്മയ്ക്കൊപ്പമായിരുന്നു മോഡിയുടെ പിറന്നാള് ആഘോഷം. മാതാവ് ഒരുക്കിയ സദ്യയാണ് പ്രധാനമന്ത്രി അന്ന് കഴിച്ചത്. പിറന്നാള് ആഘോഷത്തിന്റെ ഭാഗമായി പ്രധാനമന്ത്രി സര്ദാര് സരോവര് അണക്കെട്ട് സന്ദര്ശിക്കുകയും ഇവിടെ അര്ച്ച നടത്തുകയും ചെയ്തത് വിവാദമാകുകയും ചെയ്തിട്ടുണ്ട്.
അണക്കെട്ട് നിശ്ചയിച്ച സമയത്തിലും മുമ്പ് തുറന്നുവെന്ന ആരോപണവുമായി മധ്യപ്രദേശ് എത്തിയിട്ടുണ്ട്. ഗുജറാത്ത് സര്ക്കാര് സംഘടിപ്പിച്ച നമാമി ദേവി നര്മ്മദാ മഹോത്സവത്തിന്റെ പേരില് നിശ്ചയിച്ച സമയത്തിലും മുമ്പേ അണക്കെട്ട് നിറച്ചെന്നും ഇത് മദ്ധ്യപ്രദേശിലെ അഞ്ചു ജില്ലകളെ ദുരിതത്തിലാക്കിയെന്നുമാണ് ആരോപണം. അണക്കെട്ടിലെ വെള്ളം കൂടിയതോടെ മധ്യപ്രദേശിലെ അഞ്ച് ജില്ലകളിലെ ദുരിതാശ്വാസ പുനരധിവാസ പ്രവര്ത്തനങ്ങളെ ഇത് ബാധിച്ചതായും മധ്യപ്രദേശ് ആഭ്യന്തര മന്ത്രി പറഞ്ഞു.
നര്മ്മദാ നിയന്ത്രണ അതോറിറ്റിയുടെ നിര്ദേശപ്രകാരം ആണെങ്കില് ഒക്ടോബര് പകുതിയോടെയെ അണക്കെട്ട് മുഴുവന് നിറയുകയുള്ളുവെന്നുമാണ് സൂചനകള്. പ്രധാനമന്ത്രിയുടെ ജന്മദിനം ആഘോഷിക്കാന് ഒരു മാസം മുമ്പേ ഇത് നിറയ്ക്കുകയായിരുന്നു. അണക്കെട്ടിലെ പരമാവധി ജലനിരപ്പായ 138.68 മീറ്ററിലാണ് സര്ദാര് സരോവര് അണക്കെട്ടില് മോദി ജന്മദിനാഘോഷത്തിന്റെ ഭാഗമായി അര്ച്ചന നടത്തിയത്.
