ആകെ പുലിവാലു പിടിച്ച് പുതിയ മോട്ടോര് വാഹന നിയമം. മോട്ടോര് വാഹനനിയമ ലംഘനങ്ങള്ക്ക് പുതിയ പിഴ ചുമത്തിത്തുടങ്ങിയതോടെ വാഹനത്തിന്റെ വിലയേക്കാള് പിഴയൊടുക്കേണ്ട അവസ്ഥയിലാണ് പലരും. മോട്ടോര് വാഹന നിയമ ഭേദഗതിക്ക് പിന്നാലെ നിരവധി പ്രശ്നങ്ങളാണ് പല സംസ്ഥാനങ്ങളിലും റിപ്പോര്ട്ട് ചെയ്യപ്പെട്ടുകൊണ്ടിരിക്കുന്നത്.
ഒഡീഷയില് നിയമം ലംഘിച്ച സ്കൂട്ടര് യാത്രികന് ഒരു ലക്ഷം രൂപയാണ് മോട്ടോര് വാഹന വകുപ്പ് പിഴയിട്ടിരിക്കുന്നത്. നിരത്തിലിറക്കിയ പുതിയ ഹോണ്ട ആക്ടീവ സ്കൂട്ടറിന് നമ്പരും താത്കാലിക പെര്മിറ്റും ഇല്ലെന്ന് ചൂണ്ടിക്കാട്ടിയാണ് ഒരുലക്ഷം രൂപ പിഴയിട്ടിരിക്കുന്നത്. എന്നാല്, ഈ വാഹനത്തിന്റെ വിലയോ.... 70,000 രൂപയില് താഴെയും.
ഓഗസ്റ്റ് 28 നാണ് ഈ സ്കൂട്ടര് വാങ്ങിയത്. അതിന് ശേഷം സെപ്റ്റംബര് 12 ന് ഉടമ ഈ വാഹനവുമായി വാഹന പരിശോധനയില് പെടുകയായിരുന്നു. പരിശോധനയില് വാഹനത്തിന്റെ രജിസ്ട്രേഷന് കഴിഞ്ഞിട്ടില്ലെന്ന് കാണിച്ച് വാഹന ഉടമയ്ക്ക് ഒരുലക്ഷം രൂപ പിഴ ഇടുകയായിരുന്നു. രേഖകളൊന്നും നല്കാതെ ഉപഭോക്താവിന് വാഹനം നല്കിയതിന് ഡീലര്ഷിന്റെ ലൈസന്സ് റദ്ദാക്കാനും ആര്.ടി.ഒ നിര്ദേശിച്ചിട്ടുണ്ട്.
പുതിയ നിയമപ്രകാരം വാഹനം ഉപഭോക്താവിന് കൈമാറുമ്പോള് രജിസ്ട്രേഷന് നമ്പര്, ഇന്ഷുറന്സ്, പുക പരിശോധന സര്ട്ടിഫിക്കറ്റ് എന്നിവ ഡീലര്മാര് നല്കണമെന്നതാണ് നിര്ദേശം.
