കൊല്‍ക്കത്ത: കേന്ദ്രമന്ത്രിയെ യാദവ്പൂര്‍ സര്‍വകലാശാലയില്‍ ഇടതു സംഘടനകളിലെ വിദ്യാര്‍ത്ഥികള്‍ തടയുകയും കയ്യേറ്റം ചെയ്തതുമായ സംഭവത്തില്‍ ബാബുല്‍ സുപ്രിയോ വിദ്യാര്‍ത്ഥിനികളോട് മോശമായി പെരുമാറിയെന്ന് ആരോപണം. പ്രതിഷേധത്തില്‍ പങ്കെടുത്ത പെണ്‍കുട്ടികളോട് മോശം പരാമര്‍ശം നടത്തിയ മന്ത്രി തന്റെ മുറിയിലേക്ക് തനിച്ച് ക്ഷണിക്കുകയും ചെയ്തതായിട്ടാണ് വിദ്യാര്‍ത്ഥി പ്രതിനിധികളുടെ ആരോപണം.
പെണ്‍കുട്ടികളുടെ ഇറക്കം കുറഞ്ഞ വസ്ത്രത്തിന് മേല്‍ കമന്റു പറഞ്ഞ മന്ത്രി എന്തിനാണ് ചെറിയ വസ്ത്രങ്ങള്‍ ധരിക്കുന്നതെന്നും ഇങ്ങിനെ എന്തിനാണ് ക്യാമ്പസില്‍ വരുന്നതെന്നും വിദ്യാര്‍ത്ഥിനികളോട് ചോദിച്ചു. പിന്നീട് തനിച്ച് തന്റെ മുറിയില്‍ വന്നാല്‍ താന്‍ ആരാണെന്ന് കാണിച്ചു തരാമെന്നും പെണ്‍കുട്ടികളോട് പറഞ്ഞു. ഇന്നലെ ആയിരുന്നു ക്യാംപസിലെ ഒരു ആര്‍എസ്എസ് പരിപാടിയില്‍ പങ്കെടുക്കാന്‍ കേന്ദ്രമന്ത്രി എത്തിയതും വിദ്യാര്‍ത്ഥികള്‍ തടഞ്ഞതും. കരിങ്കൊടി കാട്ടി മന്ത്രിയെ പ്രതിഷേധം അറിയിക്കുക മാത്രമാണ് ലക്ഷ്യമിട്ടിരുന്നതെന്നും എന്നാല്‍ ക്യാംപസില്‍ കയറിക്കൂടിയ ബിജെപി സംഘപരിവാര്‍ പ്രവര്‍ത്തകരാണ് ആക്രമണം നടത്തിയതെന്നും ഇടതു സംഘടനയിലെ വിദ്യാര്‍ത്ഥികള്‍ ആരോപിക്കുന്നു.
പുറത്തുനിന്നെത്തിയ 30-40 വയസുവരുന്ന നിരവധി ആളുകളാണ് ആക്രമണത്തിന് ചുക്കാന്‍ പിടിച്ചതെന്നും ഇടത് വിദ്യാര്‍ത്ഥി സംഘടനകളുടെ മേല്‍ ആക്രമണത്തിന്റെ ഉത്തരവാദിത്തം കെട്ടിവെക്കാനായിരുന്നു അവരുടെ ശ്രമമെന്നും വിദ്യാര്‍ത്ഥികള്‍ ആരോപിക്കുന്നു. യൂണിവേഴ്സിറ്റി കാമ്പസിന് പുറത്ത് നിന്ന് ‘ജയ് ശ്രീ റാം’ വിളിച്ചുവന്ന ആള്‍ക്കൂട്ടം തന്നെ മര്‍ദ്ദിച്ചെന്ന് പവന്‍ ശുക്ല എന്ന വിദ്യാര്‍ത്ഥിയെ ഉദ്ധരിച്ച് മാധ്യമങ്ങള്‍ വാര്‍ത്ത പുറത്തു വിട്ടിട്ടുണ്ട്. പുറത്തുപോയി വൈകിട്ട് തിരികെ എത്തിയപ്പോള്‍ ക്യാംപസിലേക്കുള്ള നാലാംഗേറ്റില്‍ വടിയും സ്റ്റമ്പുകളും പിടിച്ച നിലയില്‍ ഒരുകൂട്ടം ആളുകരെ കണ്ടു. ആരാണെന്നും എന്തിനാണ് വടികളുമായി നില്‍ക്കുന്നതെന്നും ചോദിച്ചപ്പോള്‍ അവര്‍ തന്നെ ആക്രമിച്ചതായി ശുക്ല പറഞ്ഞു.
തലപൊട്ടി ചോരയൊലിച്ച് വെള്ള ഷര്‍ട്ട് നിറയെ രക്തക്കറയുമായി നില്‍ക്കുന്ന ഒന്നാം വര്‍ഷ ബിരുദ വിദ്യാര്‍ത്ഥി ശുക്ലയുടെ ചിത്രം സാമൂഹ്യ മാധ്യമങ്ങള്‍ വഴി പുറത്തു വന്നിരുന്നു. മര്‍ദ്ദിക്കുമ്പോള്‍ ‘ജയ് ശ്രീ റാം, ജയ് ശ്രീ റാം’ എന്ന് വിളിക്കുന്നുണ്ടായിരുന്നു. അറുപതോളം വരുന്ന സംഘം 15 മിനിറ്റോളം മര്‍ദ്ദിച്ചു. എനിക്ക് ഒന്നും ചെയ്യാന്‍ കഴിഞ്ഞില്ല. എന്താണ് സംഭവിക്കുന്നതെന്ന് പോലും മനസിലാക്കാന്‍ സാധിച്ചില്ല. നെറ്റിയില്‍ സിന്ദൂരം തൊട്ടിരുന്ന അവരില്‍ പലരും 30 നും 40 നും ഇടയില്‍ പ്രായക്കാരായിരുന്നു. അവര്‍ വിദ്യാര്‍ത്ഥികളോ ക്യാംപസിനുള്ളില്‍ ഉള്ളവരോ അല്ലെന്ന് വ്യക്തം. നിങ്ങള്‍ക്ക് 200-300 രൂപയ്ക്കോ ഒരു കുപ്പി മദ്യത്തിനോ വാടകയ്ക്കെടുക്കാന്‍ കഴിയുന്ന ഇവര്‍ താഴ്ന്ന വരുമാനക്കാരോ സാധാരണക്കാരായ ആള്‍ക്കാരോ ആണെന്ന വ്യക്തമാണെന്ന് ശുക്ലയെ ഉദ്ധരിച്ച് ദി ക്വിന്റ് പുറത്തു വിട്ട റിപ്പോര്‍ട്ടില്‍ പറയുന്നു.
Comments