നെടുമ്പാശേരി: മുത്തശി ദേശം കുന്നുംപുറം മൂര്ക്കന്നൂര് വീട്ടില് ലക്ഷ്മിക്കുട്ടിയമ്മ (113) നിര്യാതയായി. ആറ് മക്കളൂം അവരുടെ കുടുംബാംഗങ്ങളും ഉള്പ്പെടെ അഞ്ച് തലമുറയിലെ 350 ഓളം പേരുടെ ജീവിച്ചിരിക്കുന്ന കണ്ണിയാണ് ശനിയാഴ്ച അറ്റത്. ആയിരക്കണക്കിന് സൂര്യചന്ദ്രനെ ദര്ശിച്ച ലക്ഷ്മിക്കുട്ടിയമ്മ ഏതാനും വര്ഷം മുമ്പുവരെ നെല്കൃഷിയിലും ക്ഷീരകര്ഷകയായും സജീവമായി നിലയുറപ്പിച്ചിരുന്നു.
110-ാം വയസിലും ചുറുചുറുക്കോടെയായിരുന്നു വീട്ടിലെ ഓരോ ജോലികളും ചെയ്തിരുന്നത്. നൂറ്റാണ്ടോളം മുമ്പുള്ള ചരിത്രസംഭവങ്ങളും നാട്ടുരീതികളും അറിയാമായിരുന്ന മുത്തശ്ശിയെ തേടി സ്കൂള്, കോളജുകളില് നിന്ന് വിദ്യാര്ഥികളും ലക്ഷ്മിക്കുട്ടിയമ്മയെ തേടിയെത്താറുണ്ടായിരുന്നു. ജീവിതാനുഭവങ്ങളും ചരിത്രവും പലതും ഓര്ത്തെടുത്ത് അവ പുതുതലമുറക്ക് ഇവര് പകര്ന്നുനല്കുകയും ചെയ്തിരുന്നു. സ്വന്തം കാര്യങ്ങള് പരസഹായങ്ങളില്ലാതെ നിര്വഹിച്ചിരുന്ന ലക്ഷ്മിക്കുട്ടി ഒരു വര്ഷം മുമ്പ് കുളിമുറിയില് തെന്നിവീണതോടെയാണ് കിടപ്പിലായത്.
അസഹ്യമായ വേദനയെത്തുടര്ന്ന് ഇടുപ്പെല്ലിന് ശസ്ത്രക്രിയ ചെയ്തെങ്കിലും പിന്നെ എഴുന്നേറ്റില്ല. പരസഹായത്തോടെ തന്റെ ആവശ്യങ്ങള് നിര്വഹിക്കേണ്ടി വരുന്നതിലെ വിഷമമായിരുന്നു വാര്ധക്യത്തിന്റെ നൊമ്പരങ്ങളെക്കാള് കൂടുതലായി ആ വയോധികയെ അലട്ടിയിരുന്നത്. എല്ലാവര്ഷവും കുടുംബാംഗങ്ങള് ദേശം കുന്നുംപുറത്തുള്ള മൂര്ക്കന്നൂര് തറവാട്ടില് ഒത്തുകൂടി ലക്ഷ്മിക്കുട്ടി അമ്മയുടെ ജന്മദിനവും മുറ തെറ്റാതെ ആഘോഷിച്ചിരുന്നു. ആറു മക്കളില് രണ്ടുമക്കളും മരുമകനും വര്ഷങ്ങള്ക്കുമുമ്പ് മരണപ്പെട്ടു.
മകന് വാസുദേവന് നായരുടെ വീട്ടില് ശനിയാഴ്ച അര്ധരാത്രിയോടെയായിരുന്നു ലക്ഷ്മിക്കുട്ടി അമ്മയുടെ അന്ത്യം. സംസ്കാരം നടത്തി. മക്കള്: അംബുജാക്ഷി അമ്മ, വാസുദേവന് നായര്, ഭാര്ഗവി അമ്മ, ചന്ദ്രശേഖരന്, പരേതരായ പരമേശ്വരന് നായര്, ഗോപാലന് നായര്. മരുമക്കള്: ശ്രീമതിയമ്മ, ഭവാനി, ഓമന, രാമകൃഷ്ണന്, രാധാമണി, പരേതനായ കൃഷ്ണന്കുട്ടി നായര്.
