നടി രഞ്ജിതയുമായി ബന്ധപ്പെട്ട വീഡിയോയിലൂടെ വിവാദ നായകനായി മാറിയ ആള്ദൈവം നിത്യാനന്ദക്കെതിരെ വിദേശവനിതയായ മുന് ശിഷ്യ ബാല പീഡനം ആരോപിച്ച് രംഗത്ത്. യുട്യൂബ് ചാനലില് നടത്തുന്ന വെളിപ്പെടുത്തലിലൂടെ പന്ത്രണ്ടും പതിമൂന്നും വയസ്സ് പ്രായത്തിലുള്ള രണ്ടു കുട്ടികളെ പീഡിപ്പിച്ചിരുന്നു എന്ന് നിത്യാനന്ദയ്ക്കും നടി രഞ്ജിതയ്ക്കും എതിരേ ആരോപണം ഉന്നയിച്ച് രംഗത്തു വന്നിരിക്കുന്നത് കനേഡിയന് വനിതയായ സാറാ സ്റ്റെഫാനി ലാന്ട്രിയാണ്. നിത്യാനന്ദയോടെ പോരാടാന് താന് കാനഡ വിടുകയാണെന്നും ഇവര് വെളിപ്പെടുത്തുന്നു.
നിത്യാനന്ദയുടെ ഭക്തയായി ആശ്രമത്തില് ഉണ്ടായിരുന്ന കാലത്ത് പീഡനത്തിനിരയായ രണ്ടു കുട്ടികള് ഇക്കാര്യം തന്നോട് തുറന്നു പറഞ്ഞിരുന്നു എന്നും കുട്ടികളെ മര്ദ്ദിക്കുക ഉള്പ്പെടെയുള്ള ക്രൂരതകള് കുട്ടികള്ക്ക് മേല് നിത്യാനന്ദ നടത്തിയിരുന്നതായുമാണ് ആരോപണം. രഹസ്യ പരിശീലനം എന്ന പേരിലായിരുന്നു കുട്ടികളെ പീഡിപ്പിച്ചുരുന്നത്. ഇതിനായി നിത്യാനന്ദയ്ക്ക് ഒത്താശ ചെയ്തു കൊടുത്തിരുന്നത് നടി രഞ്ജിത ആയിരുന്നു എന്നും പറയുന്നു. കുട്ടികളെ കൊണ്ടു ജോലികള് ചെയ്യിക്കുക പതിവായിരുന്നു. പട്ടിണിക്കിട്ടും നിര്ജ്ജലീകരണം നടത്തിയുമാണ് അനുസരിപ്പിച്ചിരുന്നത്. ഈ രഞ്ജിതയോട് ഇക്കാര്യം പറഞ്ഞിട്ട് അവര് നിത്യാനന്ദക്കെതിരെ ഒരു നടപടിയും സ്വീകരിച്ചില്ലെന്നും സാറ ആരോപിക്കുന്നു.
പീഡനങ്ങള്ക്ക് മുന്കൈയ്യെടുത്തിരുന്നത് രഞ്ജിതയാണെന്നും സാറാ വീഡിയോയിലൂടെ ആരോപിച്ചു. കുറെ വര്ഷം ശ്രീ നിത്യ സ്വരൂപ പ്രിയാനന്ദ എന്ന ആശ്രമത്തില് കഴിഞ്ഞിട്ടുള്ള സാറയെ നിത്യാനന്ദയുടെ ആശ്രമത്തിന്റെ ഐക്കണായിട്ടാണ് അവതരിപ്പിക്കപ്പെട്ടിരുന്നത്. നിത്യാനന്ദയുടെ ആശ്രമത്തിലെ കാഷായ വസ്ത്രമണിഞ്ഞ് നിത്യാനന്ദയെയും നടി രഞ്ജിതയേയും പ്രകീര്ത്തിക്കുന്ന ഇവരുടെ വീഡിയോ നേരത്തേ പുറത്തുവന്നിട്ടുണ്ട്. എന്നാല് കാഷായ വസ്ത്രം ഉപേക്ഷിച്ച് മോഡേണ് ലുക്കിലാണ് യുട്യൂബ് വീഡിയോയില് സാറാ പ്രത്യക്ഷപ്പെട്ടിരിക്കുന്നത്. ആശ്രമത്തില് നിത്യാനന്ദയുടെ സഹായിയായി കഴിയുന്ന നടിയുമായി ബന്ധപ്പെട്ട വിവാദ വീഡിയോ ആള്ദൈവത്തെ വെട്ടിലാക്കിയിരുന്നു.
