ന്യുഡല്ഹി: ഐ.എന്.എക്സ് മീഡിയ കേസില് നിതി അയോഗ് മുന് സി.ഇ.ഒ സിന്ധുശ്രീ ഖുല്ലാറിനെയും മറ്റ് ആരോപണവിധേയരേയും പ്രോസിക്യൂട്ട് ചെയ്യാന് സി.ബി.ഐയ്ക്ക് കേന്ദ്രസര്ക്കാരിന്റെ അനുമതി. ഐ.എന്.എക്സ് മീഡിയ ഇടപാടിന് വിദേശ നിക്ഷേപ പ്രോത്സാഹന ബോര്ഡിന്റെ ക്ലിയറന്സുമായി ബന്ധപ്പെട്ടാണ് ഇവര് അന്വേഷണം നേരിടുന്നത്.
സിന്ധുശ്രീക്ക് പുറമേ മൈക്രോ, ചെറുകിട, ഇടത്തരം സംരംഭ മന്ത്രാലയം മുന് സെക്രട്ടറി അനൂപ് കെ.പൂജാരി, ഇടപാട് നടന്നകാലത്തെ ധനകാര്യ സെക്രട്ടറിയായിരുന്ന പ്രാബോധ് സക്സേന, ധനകാര്യ വിഭാഗത്തിലെ മുന് അണ്ടര് സെക്രട്ടറി രബീന്ദ്ര പ്രസാദ് എന്നിവരെയും പ്രോസിക്യുട്ട് ചെയ്യാന് അനുമതി നല്കിയിട്ടുണ്ട്. മുന് ധനമന്ത്രി പി.ചിദംബരത്തെ പ്രോസിക്യൂട്ട് ചെയ്യാന് ഫെബ്രുവരിയില് സര്ക്കാര് അനുമതി നല്കിയിരുന്നു.
2004 മുതല് 2008 വരെയാണ് സിന്ധുശ്രീ ഖുല്ലര് ധനകാര്യ വകുപ്പില് അഡീഷണല് സെക്രട്ടറിയായി പ്രവര്ത്തിച്ചത്. 2006 മുതല് 2010 വരെ പൂജാരി ജോയിന്റ് സെക്രട്ടറിയമായിരുന്നു. 2008 മുതല് 2010 വരെ സക്സേന വകുപ്പിന്റെ് ഡയറക്ടറായി പ്രവര്ത്തിച്ചിരുന്നു. ഇടപാട് നടന്ന കാലയളവില് രബീന്ദ്ര പ്രസാദും വകുപ്പിലുണ്ടായിരുന്നു.
ചിദംബരം ധനമന്ത്രിയായിരിക്കേ 2007ല് ഐ.എന്.എക്സ് മീഡിയയ്ക്കു വേണ്ടി എത്തിയ വിദേശ ഫണ്ടിന്റെ കാര്യത്തില് ക്ലിയറന്സ് നല്കിയതില് വിദേശ ഫണ്ട് പ്രോത്സാഹന ബോര്ഡില് ക്രമക്കേട് നടന്നുവെന്ന് ചൂണ്ടിക്കാട്ടി 2017 മേയ് 15നാണ് സി.ബി.ഐ എഫ്.ഐ.ആര് സമര്പ്പിച്ചത്. പീറ്റര് മുഖര്ജി, ഇന്ദ്രാണി മുഖര്ജി എന്നിവരുടെ ഉടമസ്ഥതയിലുള്ളതാണ് ഐ.എന്.എക്സ് മീഡിയ. ഇടപാടുമായി ബന്ധപ്പെട്ട കള്ളപ്പണം, അഴിമതി കേസുകളില് ഇവര് മുഖ്യപ്രതികളാണ്.
