തിരുവനന്തപുരം: ഉപതെരഞ്ഞെടുപ്പില് വട്ടിയൂര്കാവില് ബിജെപി മുന് സംസ്ഥാന അധ്യക്ഷന് കുമ്മനം രാജശേഖരന് ബിജെപി സ്ഥാനാര്ത്ഥിയാകില്ല. ജില്ലാ അദ്ധ്യക്ഷന് അഡ്വ. എസ്. സുരേഷ് ആണ് വട്ടിയൂര്കാവില് ബിജെപി പാനലില് മത്സരിക്കുക. കോന്നിയില് ബിജെപി സംസ്ഥാന ജനറല് സെക്രട്ടറി കെ സുരേന്ദ്രന് മത്സരിക്കും.
നേരത്തെ കുമ്മനം രാജശേഖരന് വട്ടിയൂര് കാവില് സ്ഥാനാര്ത്ഥിയാകുമെന്ന വിവരം ഉണ്ടായിരുന്നു. ഇക്കാര്യം തള്ളാതെ കുമ്മനവും രംഗത്തെത്തിയിരുന്നു. പാര്ട്ടി പറഞ്ഞാല് താന് മത്സരിക്കും എന്നായിരുന്നു കുമ്മനത്തിന്റെ പ്രതികരണം. എന്നാല് കുമ്മനത്തെ സ്ഥാനാര്ത്ഥിയാക്കുന്നതില് പാര്ട്ടിക്കുള്ളില് തന്നെ അസ്വാരസ്യങ്ങള് ഉണ്ടായിട്ടുണ്ടെന്ന വാര്ത്തകള് പുറത്തെത്തിയിരുന്നു. വട്ടിയൂര്ക്കാവിലെ ജില്ലാ ഘടകം കുമ്മനത്തിന്റെ സ്ഥാനാര്ത്ഥിത്വത്തിനെതിരെ പ്രതിഷേധം ഉയര്ത്തിയെന്നായിരുന്നു വിവരം. ഇതോടെ കുമ്മനത്തിനായുള്ള പ്രചരണ പ്രവര്ത്തനങ്ങള് നിര്ത്തിവെയ്ക്കാന് ജില്ലാ ഘടകത്തിന് സംസ്ഥാന നേതൃത്വത്തിന് നിര്ദ്ദേശം നല്കിയതായും വിവരങ്ങളുണ്ട്.
ഇക്കുറി മത്സരിക്കാനില്ലെന്നായിരുന്നു നേരത്തെ കെ സുരേന്ദ്രന് പ്രതികരിച്ചിരുന്നത്. എന്നാല് ഒടുവില് കോന്നിയില് കെ സുരേന്ദ്രനെ തന്നെ സ്ഥാനാര്ത്ഥിയാക്കുകയായിരുന്നു. ശബരിമല സ്ത്രീപ്രവേശനം പ്രചാരണ ആയുധമാക്കാനാണ് ബിജെപിയുടെ നീക്കം. കേന്ദ്ര സര്ക്കാരിന്റെഭരണ നേട്ടങ്ങളും സജീവ ചര്ച്ചയാക്കി വോട്ട് വിഹിതം കൂട്ടാമെന്നും എന്ഡിഎ പ്രതീക്ഷിക്കുന്നുണ്ട്. കോന്നിയില് കെ സുരേന്ദ്രന്റെയും ശോഭാ സുരേന്ദ്രന്റെയും പേരുകളായിരുന്നു ആദ്യം മുതലേ ഉയര്ന്നിരുന്നത്.
