പിറവം: എന്നും അസംഖ്യം തിരികള് തെളിഞ്ഞിരുന്ന പിറവം വലിയ പള്ളിയിലെ കെടാവിളക്ക് വിശ്വാസികള്ക്കു പ്രവേശനം ഇല്ലാതായതോടെ അണഞ്ഞു. കെടാവിളക്ക് അണഞ്ഞതു വിശ്വാസികള്ക്കുണ്ടാക്കിയ പ്രയാസം തിരിച്ചറിഞ്ഞിട്ടാകണം, സുരക്ഷാ ചുമതലയിലുള്ള പോലീസ് ഉദ്യോഗസ്ഥര് തിങ്കളാഴ്ച സന്ധ്യക്കു നിലവിളക്കില് എണ്ണ പകര്ന്ന് തിരിതെളിച്ചു. കല്ക്കുരിശിനു മുന്നിലുള്ള വിളക്കില് പോലീസുകാര് തിരിതെളിക്കുന്ന ദൃശ്യങ്ങള് സാമൂഹിക മാധ്യമങ്ങളില് വൈറലായി.
വലിയ പള്ളിയിലെ കെടാവിളക്കിനെ നാടിന്റെ ഐശ്വര്യമായാണു കണക്കാക്കിയിരുന്നത്. എന്നും രാത്രിയില് പള്ളി അടയ്ക്കുമ്പോഴും വിളക്കിലെ ഒരു തിരി അണയ്ക്കുമായിരുന്നില്ല. കഴിഞ്ഞ 26-നു യാക്കോബായ വിഭാഗത്തെ പുറത്തിറക്കി പള്ളി എറണാകുളം ജില്ലാ കലക്ടര് ഏറ്റെടുത്തതോടെ വിശ്വാസികള്ക്കു പ്രവേശനമില്ലാതായി. അതോടെ കെടാവിളക്കണഞ്ഞു. അവിടെയാണു പോലീസ് ഉദ്യോഗസ്ഥര് വീണ്ടും തിരി തെളിച്ചത്.
തലമുറകളായി ആരാധന നടത്തി വന്നിരുന്ന പള്ളിയില് നിന്ന് ഇറങ്ങേണ്ടിവന്നതിന്റെ വേദനയിലാണു യാക്കോബായ വിഭാഗക്കാര്. കോടതിയുത്തരവ് പ്രകാരം അവസരം ലഭിച്ചതോടെ കഴിഞ്ഞ ഞായറാഴ്ച ഓര്ത്തഡോക്സ് വിഭാഗമാണു പള്ളിയില് കുര്ബാനയര്പ്പിച്ചത്. യാക്കോബായ വിശ്വാസികള് പാതയോരത്തു താല്ക്കാലിക ബലിപീഠമൊരുക്കിയാണു കുര്ബാനയര്പ്പിച്ചത്.
