റബാത്ത്: വിവാഹത്തിന് മുമ്പ് ലൈംഗികതയില് ഏര്പ്പെടുകയും ഗര്ഭം അലസിപ്പിക്കുകയും ചെയ്തെന്ന കുറ്റത്തിന് മാധ്യമപ്രവര്ത്തകയ്ക്കും കാമുകനും മൊറാക്കോയില് തടവുശിക്ഷ. മൊറാക്കോയിലെ പ്രമുഖ മാധ്യമവും സര്ക്കാരിനെ വിമര്ശിക്കുന്ന വാര്ത്തകളിലൂടെ ശ്രദ്ധനേടുകയും ചെയ്ത അക്ബര് അല് യൂമിലെ ജര്ണലിസ്റ്റ് ഹാജര് റെയ്സോണി എന്ന 28 കാരിക്കും കാമുകന് റിഫാത്ത് അല് അമിനുമാണ് ശിക്ഷ വിധിച്ചത്.
വിവാഹപൂര്വ്വ ലൈംഗികതയും ഗര്ഭഛിദ്രവും മൊറാക്കോയില് ക്രിമിനല് കുറ്റമാണ്. ഒരു വര്ഷത്തെ തടവാണ് ഇരുവര്ക്കും കിട്ടിയത്. ആഗസ്റ്റ് 31 ന് ഗൈനക്കോളജിസ്റ്റ് ഡോ. ജമാല് ബില്ക്കിസിസിന്റെ റബാറ്റിലെ ഓഫീസില് നിന്നും അവരെ കണ്ട ശേഷം തിരിച്ചുവരുന്ന വഴിയിലാണ് ഇരുവരും അറസ്റ്റിലായത്. റെയ്സോണിക്ക് ഗര്ഭഛിദ്രം നടപ്പാക്കിയ ഗൈനക്കോളജിസ്റ്റിന് കിട്ടിയത് രണ്ടു വര്ഷത്തെ തടവാണ്. കാമുകനെ സന്ദര്ശിക്കാന് പോയ സമയത്ത് റെയ്സോണി അല് അമീനുമായി ശാരീരികമായി ബന്ധപ്പെട്ടെന്നും ഇതിലൂടെ ഉണ്ടായ ഗര്ഭധാരണം അലസിപ്പിച്ചെന്നും കുറ്റപത്രത്തില് പറഞ്ഞു. അതേസമയം ആരോപണം രണ്ടു പേരും നിഷേധിച്ചിട്ടുണ്ട്. കാമുകന്റെ വീട്ടില് പോയത് അദ്ദേഹം വിദേശത്തേക്ക് പോയ സമയത്ത് പട്ടിയെ പരിപാലിക്കാന് ആയിരുന്നെന്നും ചികിത്സ തേടിയത് ആന്തരീക രക്തസ്രാവത്തിന് ആയിരുന്നു എന്നും റെയ്സോണി പറയുന്നു.
വിധിക്കെതിരേ അപ്പീലിന് പോകുമെന്നും പറഞ്ഞിട്ടുണ്ട്. അതേസമയം വിധിയെ സര്ക്കാരിനെ വിമര്ശിച്ച് നിരന്തരം വാര്ത്തകള് എഴുതുന്നവര്ക്കുള്ള താക്കീതിന്റെ ഏറ്റവും പുതിയ ഉദാഹരണമായിട്ടാണ് മൊറാക്കോ ജര്ണലിസ്റ്റുകള് കരുതുന്നത്. സര്ക്കാര് വിരുദ്ധ പ്രക്ഷോഭങ്ങള് നടത്തുകയും വാര്ത്ത എഴുതുകയും ചെയ്തതിന് രാഷ്ട്രീയ പക പോക്കലാണ് റെയ്സോണിയ്ക്ക് കിട്ടിയതെന്നാണ് ഇവരുടെ വാദം. മാധ്യമപ്രവര്ത്തകരുടെ ജോലി അടിസ്ഥാനമാക്കി തടവിന് ശിക്ഷിക്കുന്നത് 2016 ല് മൊറാക്കോയില് നിറുത്തലാക്കിയിരുന്നു.
എന്നാല് സര്ക്കാര് ഇതിന് പകരം മറ്റു കുറ്റങ്ങള് കണ്ടെത്തി ശിക്ഷിക്കുകയാണ്. കഴിഞ്ഞ വര്ഷം സര്ക്കാര് വിമര്ശനം നടത്തിയതിന് പിന്നാലെ അല് അക്ബര് യോമിന്റെ സ്ഥാപകനും പ്രസാധകനുമായ തൗഫീസ് ബൗച്ചറിന്നിനെ ലൈംഗികാപവാദത്തില് കുരുക്കി 12 വര്ഷം തടവ് ശിക്ഷ വിധിച്ചിരുന്നു. മൊറാക്കോയിലെ സ്വതന്ത്ര പത്രമാണ് അക്ബര് അല് യോം. ഇതില് മനുഷ്യാവകാശങ്ങളെക്കുറിച്ചും രാഷ്ട്രീയവുമെല്ലാം റെയ്സോണി എഴുതിയിരുന്നു. രാജ്യത്തിന്റെ വടക്കന് മേഖലയായ റിഫില് അനേകം സര്ക്കാര് വിരുദ്ധ പ്രക്ഷോഭത്തിനും റെയ്സോണി നേതൃത്വം നല്കിയിരുന്നു. കടുത്ത യാഥാസ്ഥിതികത പുലര്ത്തുന്ന മൊറാക്കോയില് വിവാഹ പൂര്വ്വ ലൈംഗികതയ്ക്കും ഗര്ഭഛിദ്രത്തിനുമെല്ലാം വിലക്കുണ്ട്. ദിവസങ്ങള്ക്ക് മുമ്പാണ് ഇവ രണ്ടും നിയമപരമാക്കണം എന്നാവ്യെപ്പെട്ട് ആയിരങ്ങള് ഒപ്പിട്ട നിവേദനം സര്ക്കാരിന് സമര്പ്പിക്കപ്പെട്ടത്.
ഇതേ തുടര്ന്ന് ബലാത്സംഗം, അണുബാധ തുടങ്ങിയ സാഹചര്യത്തില് ഗര്ഭഛിദ്രം നടത്താമെന്ന് നിയമമാക്കുന്നതിനേ കുറിച്ച് ആലോചനയുണ്ട്. ഗര്ഭാവസ്ഥ ജീവന് ഭീഷണിയാകുന്ന സാഹചര്യം ഉണ്ടെങ്കില് മാത്രമേ നിലവില് ഗര്ഭഛിദ്രം മൊറാക്കോയില് അനുവദനീയമാകുന്നുള്ളൂ. കഴിഞ്ഞ വര്ഷം ഗര്ഭഛിദ്രം നടത്തിയതിന് അറസ്റ്റിലായത് 73 പേരാണ്.
