വാഷിംഗ്ടണ്: കശ്മീര് വിഷയത്തില് ഇന്ത്യയും പാകിസ്താനും തമ്മിലുള്ള ബന്ധം കൂടുതല് വഷളായിരിക്കുന്ന സാഹചര്യത്തില് ഇരു രാജ്യങ്ങളും തമ്മില് ആണവയുദ്ധം ഉണ്ടായാല് 125 ദശലക്ഷം പേരെങ്കിലും കൊല്ലപ്പെടുമെന്ന് റിപ്പോര്ട്ട്. ഇതിനൊപ്പം ആഗോളമായി കൊടും കാലാവസ്ഥാ വ്യതിയാനങ്ങളിലേക്ക് നയിക്കുന്ന 'ആണവ ശൈത്യ' ലേക്കും നയിക്കുമെന്ന് പഠനത്തില് പറയുന്നു. ഒരു പ്രത്യേക മേഖലയെ മാത്രമായിരിക്കില്ല ലോകത്തെ മുഴുവന് വിഷയം ബാധിക്കുമെന്ന് അമേരിക്കയിലെ റുട്ട്ഗര്- ന്യൂബ്രങ്ക്സ്വിക്ക് സര്വകലാശാലയിലെ അലന് റോബോക്ക് പറയുന്നു.
സയന്സ് അഡ്വാന്സ് എന്ന ജര്ണലില് പ്രസിദ്ധീകരിക്കിരിക്കുന്ന പഠനം 2025 ല് നടന്നേക്കാവുന്ന യുദ്ധമാണ് വിലയിരുത്തിയത്. കശ്മീര് വിഷയമാക്കി ഇതിനകം അനേകം യുദ്ധങ്ങള് നടത്തിയ ഇന്ത്യയും പാകിസ്താനും ഈ സമയം കൊണ്ട് 400 മുതല് 500 വരെ ആണവായുധങ്ങള് സമ്പാദിക്കുകയയും ചെയ്യും. ഈ സമയത്ത് സസ്യങ്ങളുടെ വളര്ച്ച ഭൂമിയുടെ 15 മുതല് 30 ശതമാനത്തലേക്ക് ഒതുങ്ങൂം. സമുദ്രോത്പാദനം അഞ്ചു മുതല് 15 ശതമാനം വരെ കുറയും. ഇത് മൂലം ഉണ്ടാകുന്ന പുക മുകളിലെ പാളികളിലേക്ക് ലയിച്ചു ചേരാന് തന്നെ പത്തു വര്ഷത്തിന് മുകളില് എടുക്കുമെന്നും പഠനത്തില് പറയുന്നു.
ഒമ്പതു രാജ്യങ്ങള്ക്ക് ആണവായുധമുണ്ട്. പക്ഷേ പാകിസ്താനും ഇന്ത്യയും മാത്രമാണ് ഇത്തരം ആയുധങ്ങള് കുടുതല് ശേഖരിച്ചു കൊണ്ടിരിക്കുന്നത്. കശ്മീരിനെ വെച്ച് ഈ രണ്ട് ആണവശക്തികളും വഴക്കടിക്കുമ്പോള് യാഥാര്ത്ഥ്യങ്ങളും അനന്തരഫലങ്ങളും മനസ്സിലാക്കുന്നതും പ്രധാനമാണ്. നേരിട്ടുള്ള ആഘാതത്തില് തന്നെ 50 മുതല് 125 ദശലക്ഷം പേര് കൊല്ലപ്പെടും. പിന്നാലെ ലോകത്തുടനീളമായി ഉണ്ടാകുന്ന പട്ടിണിയിലും ദാരിദ്ര്യത്തിലും പെട്ട് ഒട്ടേറെ പേര് വേറെയും മരിക്കും. ഇവയെ പ്രതിരോധിക്കാനുള്ള ഏകമാര്ഗ്ഗം ആണവായുധങ്ങള് വേണ്ടെന്ന് വെയ്ക്കുകയാണെന്ന് റോബോക്ക് പറയുന്നു.
