എതിരെ വാഹനങ്ങള് വരുന്നുണ്ടെങ്കിലും എതിര് ദിശയിലെത്തി മുന്നിലൂടെ ഓടിക്കൊണ്ടിരിക്കുന്ന വാഹനങ്ങളെ മറികടക്കുക എന്നത് ഇപ്പോള് നിരത്തിലെ പതിവ് കാഴ്ചയാണ്. ഇത്തരത്തില് തെറ്റായ ദിശയിലൂടെ എത്തിയ തമിഴ്നാട് ട്രാന്സ്പോര്ട്ട് ബസ് തടഞ്ഞ് വൈറലായിരിക്കുകയാണ് ഒരു മലയാളി യുവാവ്.
തമിഴ്നാട്ടിലാണ് സംഭവം. മറ്റൊരു ബസിനെ മറികടക്കാന് എത്തിയ ബസാണ് മലയാളി യുവാവിന്റെ കാറിന് മുന്നില് പെട്ടത്. കേരളാ രജിസ്ട്രേഷനിലുള്ള കാറില് നിന്ന് ഇറങ്ങിയ യുവാവ് ബസ് ഡ്രൈവറുമായി വാക്കുതര്ക്കത്തില് ഏര്പ്പെടുന്നതും ദൃശ്യങ്ങളില് വ്യക്തമാണ്. തുടര്ന്ന് നാട്ടുകാരെത്തി യുവാവിനെ അനുനയിപ്പിച്ചാണ് ട്രാന്സ്പോര്ട്ട് ബസിന് വഴിയൊരുക്കിയത്.
