തിരുവനന്തപുരം : കുട്ടികളുടെ നഗ്നചിത്രങ്ങള് പങ്കുവെയ്ക്കുന്ന, പാകിസ്ഥാന് ഫോണ്നമ്പരുകള് അഡ്മിനിസ്ട്രേറ്റര്മാരായ ടെലിഗ്രാം ഗ്രൂപ്പുകളില് മലയാളികളും. കുട്ടികള്ക്കെതിരേയുളള ലൈംഗികചൂഷണം തടയാന് സംസ്ഥാന പോലീസ് ആരംഭിച്ച പ്രത്യേകവിഭാഗം ഇന്റര്പോളിന്റെ സഹായത്തോടെ നടത്തിയ പരിശോധനയിലാണ് മലയാളികളും കുട്ടികളുടെ നഗ്നചിത്രങ്ങള് പങ്കുവയ്ക്കുന്നതായി കണ്ടെത്തിയിരിക്കുന്നത്.
അഞ്ചുലക്ഷത്തോളം പേര് അംഗങ്ങളായ ഗ്രൂപ്പുകളില് സംസ്ഥാനത്തുനിന്നുളള ഒട്ടേറെപ്പേരുണ്ട്. ഗ്രൂപ്പ് സംബന്ധിച്ച വിവരങ്ങള് സംസഥാന പോലീസ് ഇന്റര്പോളിന് കൈമാറിയിട്ടുണ്ട്. കേരളത്തില് നിന്നുളള 126 അംഗങ്ങളെ തിരിച്ചറിഞ്ഞതില് 12പേരേ കഴിഞ്ഞ ദിവസം എ.ഡി.ജി.പി. മനോജ് എബ്രഹാമിന്റെ നേതൃത്വത്തിലുളള പ്രത്യേകസംഘം അറസ്റ്റുചെയ്തിട്ടുണ്ട്. ടെലിഗ്രാമില് പ്രര്ത്തിക്കുന്ന ഈ ഗ്രൂപ്പ് അഡ്മിനിസ്ട്രേറ്റര്മാരുടെയും അംഗങ്ങളുടെയും നമ്പരുകള് മറച്ചുവച്ചാണ് പ്രവര്ത്തിക്കുന്നത്.
ടെലിഗ്രാം, ഫെയ്സ്ബുക്ക് തുടങ്ങിയ സാമൂഹികമാധ്യമങ്ങളുടെയും ഇന്റര്പോളിന്റെ കുട്ടികള്ക്കെതിരായ കുറ്റകൃത്യങ്ങള്ക്കെതിരേ പ്രവര്ത്തിക്കുന്ന വിഭാഗം, ഇന്റര്നാഷണല് സെന്റര് ഫൊര് മിസ്സിങ് ആന്ഡ് എക്സ്പ്ലോയിറ്റഡ് ചില്ഡ്രന് എന്നിവയുമായി സഹകരിച്ചായിരുന്നു അന്വേഷണം. കുട്ടികള്ക്കെതിരേയുളള ലൈംഗികചൂഷണം തടയുന്നതിനായി സംസ്ഥാന പോലീസ് മേധാവി രൂപവത്കരിച്ച 'കൗണ്ടര് ചൈല്ഡ് സെക്ഷ്വല് എക്സ്പ്ലോയിറ്റേഷന്' വിഭാഗം ഇതില് വിശദപരിശോധനകള് നടത്തിയിരുന്നു.
ഓപ്പറേഷന് പി-ഹണ്ടിന്റെ ഭാഗമായി നടന്ന പരിശോധനയില് കുട്ടികളുടെ നഗ്നചിത്രങ്ങള് പ്രചരിപ്പിക്കുകയും പങ്കുവയ്ക്കുകയും ചെയ്യുന്ന ഒട്ടേറെ ഗ്രൂപ്പുകളെ തിരിച്ചറിഞ്ഞിരുന്നു. കുട്ടികള്ക്കെതിരേയുളള ലൈംഗികചൂഷണം തടയുന്നതിനുളള പ്രത്യേക വിഭാഗം സംസ്ഥാന പോലീസില് ആരംഭിച്ച ശേഷം പി-ഹണ്ടെന്ന പേരില് മൂന്നുവട്ടം വ്യാപക പരിശോധന നടത്തി. 57 കേസുകള് ഇതുവരെ രജിസ്റ്റര് ചെയ്ത് 38 പേരെ അറസ്റ്റുചെയ്തു. കുട്ടികളുടെ നഗ്നചിത്രങ്ങള് കാണുകയോ വിതരണം ചെയ്യുകയോ ശേഖരിക്കുകയോ ചെയ്യുന്നത് 5 വര്ഷം തടവും 10 ലക്ഷം രൂപ പിഴയും ലഭിക്കാവുന്ന കുറ്റമാണ്.
