താനെ: റാഫേല് വിമാനങ്ങള് നേരത്തെ ഉണ്ടായിരുന്നെങ്കില് ബലാക്കോട്ടേയില് ആക്രമണം നടത്താന് ഇന്ത്യയ്ക്ക് പാകിസ്താനില് പ്രവേശിക്കേണ്ടി വരില്ലായിരുന്നു എന്ന് പ്രതിരോധമന്ത്രി രാജ്നാഥ് സിംഗ്. ഇന്ത്യയില് ഇരുന്നു തന്നെ ആക്രമണം നടത്താന് കഴിയുമായിരുന്നു. യുദ്ധ വിമാനങ്ങള് ഇന്ത്യയുടെ സ്വന്തം പ്രതിരോധം കണക്കാക്കിയാണ് സ്വന്തമാക്കിയിട്ടുള്ളതെന്നും ആക്രമിക്കാനല്ലെന്നും പറഞ്ഞു.
ചൊവ്വാഴ്ച ഫ്രാന്സില് നടന്ന ചടങ്ങിലാണ് ഇന്ത്യ റാഫേല് വിമാനങ്ങള് സ്വന്തമാക്കിയത്. ഫ്രഞ്ചു നിര്മ്മിതമായ 36 വിമാനങ്ങളില് ആദ്യത്തേത് പ്രത്യേക പൂജ നടത്തിയാണ് രാജ്നാഥ് ഏറ്റുവാങ്ങിയത്. സൂപ്പര്സോണിക് വേഗതയില് ഇന്ത്യന് സര്ക്കാര് പുരോഗമിക്കുമ്പോള് കോണ്ഗ്രസും എന്സിപിയും സൂപ്പര് സോണിക് വേഗതയില് താഴേയ്ക്ക് പതിക്കുകയാണെന്നും പറഞ്ഞു. മഹാരാഷ്ട്രയിലെ താനേയില് തെരഞ്ഞെടുപ്പ് പ്രചരണ പരിപാടിക്കായിട്ടാണ് എത്തിയത്. വിമാനം വാങ്ങുന്നതിന് ആയുധപൂജ ചെയ്തതിനെയും ഓം എന്നെഴുതിയതും രാജ്നാഥ്സിംഗ് ന്യായീകരിച്ചു.
താന് കാട്ടിയത് തന്റെ വിശ്വാസമാണ്. ഓം എന്നാല് അനന്തമായ പ്രപഞ്ചത്തെയാണ് പ്രതിനിധീകരിക്കുന്നത് എന്നും അദ്ദേഹം പറഞ്ഞു. ക്രിസ്ത്യാനികളും മുസ്ളങ്ങളും സിക്കുകാരും ആമേന്, ഓംകാര് എന്ന വാക്കുകള് ഉപയോഗിക്കാറുണ്ടെന്നും ചൂണ്ടിക്കാട്ടി. മറ്റു മതസ്ഥരും പങ്കെടുക്കുന്ന ചടങ്ങില് ഹിന്ദു ഐക്യം വെളിവാക്കുന്ന തരത്തിലായി പ്രതിരോധമന്ത്രിയുടെ പെരുമാറ്റം ഉണ്ടായതെന്നാണ് ആരോപണം.
