റാഞ്ചി: വിരാട് കോഹ്ലിയും കൂട്ടരും ദക്ഷിണാഫ്രിക്കയ്ക്ക് എതിരെ അവസാന ആണിയും അടിച്ചു. ടെസ്റ്റ് പരമ്പയിലെ അവസാന മത്സരത്തില് ഇന്നിംഗ്സിനും 202 റണ്സിനുമായിരുന്നു ഇന്ത്യയുടെ ജയം. മൂന്നാം ടെസ്റ്റ് വെറും മൂന്ന് ദിവസം കൊണ്ടാണ് അവസാനിച്ചത്. ആദ്യ ഇന്നിംഗ്സില് രോഹിത് ശര്മ്മയുടെ ഇരട്ട സെഞ്ചുറിയുടെയും രഹാനെയുടെ സെഞ്ചുറിയുടെയും മികവില് ഇന്ത്യ 497 റണ്സ് നേടി ഡിക്ലയര് ചെയ്യുകയായിരുന്നു. എന്നാല് മറുപടി ബാറ്റിംഗിനിറങ്ങിയ ദക്ഷിണാഫ്രിക്കയുടെ ആദ്യ ഇന്നിംഗ്സ് 162നും രണ്ടാം ഇന്നിംഗ്സ് 133നും അവസാനിക്കുകയായിരുന്നു. ഇതോടെ മൂന്ന് മത്സരം അടങ്ങിയ ടെസ്റ്റ് പരമ്പര ഇന്ത്യ തൂത്തുവാരി. ഇതോടെ ലോക ടെസ്റ്റ് ചാംപ്യന്ഷിപ്പില് 240 പോയിന്റുമായി ഇന്ത്യ ഒന്നാം സ്ഥാനം നിലനിര്ത്തി.
ഇന്നലെ കളി അവസാനിപ്പിക്കുമ്പോള് ദക്ഷിണാഫ്രിക്ക 132ന് എട്ട് വിക്കറ്റ് എന്ന നിലയിലായിരുന്നു. മൂന്നാം ദിനമായ ഇന്ന് ഒരു റണ് മാത്രമാണ് ദക്ഷിണാഫ്രിക്കന് താരങ്ങള്ക്ക് നേടാനായത്. അതിനിടെ രണ്ട് വിക്കറ്റുകള് കൂടി ഇന്ത്യന് ബൗളര്മാര് പിഴുതു.
ബാറ്റിംഗിനൊപ്പം തന്നെ ഇന്ത്യന് ബൗളര്മാരും കൂടി മിന്നും പ്രകടനം കാഴ്ച വെച്ചതോടെയാണ് ഇന്ത്യന് ജയം അനായാസമായത്. ആദ്യ ഇന്നിംഗ്സില് രോഹിത് ശര്മ്മയ്ക്കും(212) രഹനയ്ക്കും(115) പുറമെ അര്ധ സെഞ്ചുറി നേടിയ ജഡേജയും(51) തകര്ത്തടിച്ച ഉമേഷ് യാദവും(പത്ത് പന്തില് 31) മികച്ച പ്രകടനം കാഴ്ചവെച്ചു. തുടര്ന്ന് ആദ്യ ഇന്നിംഗ്സ് ആരംഭിച്ച ദക്ഷിണാഫ്രിക്ക തകര്ന്നടിയുകയായിരുന്നു. 162 റണ്സിന് ദക്ഷിണാഫ്രിക്കയുടെ ആദ്യ ഇന്നിംഗ്സ് അവസാനിച്ചു. ഉമേഷ് യാദവ് മൂന്നും മുഹമ്മദ് ഷമി, നദീം, ജഡേജ എന്നിവര് രണ്ട് വിക്കറ്റ് വീതവും നേടി.
തുടര്ന്ന് രണ്ടാം ഇന്നിംഗ്സിന് ഇറങ്ങിയ ദക്ഷിണാഫ്രിക്കന് ബാറ്റിംഗ് നിരയും ഇന്ത്യന് ബൗളര്മാര്ക്ക് മുന്നില് മുട്ടുമടക്കി. ഷമി മൂന്ന് വിക്കറ്റും ഉമേഷ് യാദവും നദീമും രണ്ട് വിക്കറ്റ് വീതവും ജഡേജയും അശ്വിനും ഒരോവിക്കറ്റും വീതം നേടി. ലിന്ഡേ റണ് ഔട്ട് ആവുകയുമായിരുന്നു. ഇതോടെ ഇന്നിംഗ്സിനും 202 റണ്സിനും ഇന്ത്യ ജയം ആഘോഷിക്കുകയായിരുന്നു.
