ന്യൂഡല്ഹി: വോട്ടെടുപ്പിന് തൊട്ടുപിന്നാലെ ഹരിയാനയില് ബിജെപിയ്ക്ക് മുന്തൂക്കം പ്രഖ്യാപിച്ച എക്സിറ്റ് പോളുകള് ഒരു ദിവസം പിന്നിട്ടപ്പോള് വീണ്ടും അഭിപ്രായം മാറ്റുന്നു. ഇത്തവണ തൂക്കുമന്ത്രിസഭയാണ് പ്രവചിച്ചിരിക്കുന്നത്. ബിജെപിയും കോണ്ഗ്രസും തമ്മിലുള്ള വ്യത്യാസം നേര്ത്തതായിരിക്കുമെന്നും മറ്റുള്ളവരുടെ പിന്തുണ കൂടി വേണ്ടി വന്നേക്കുമെന്നും സൂചനയായതോടെ ഇരു പാര്ട്ടികളും മുന്നണികള് ഇതരന്മാരെ കൂടെ ചേര്ക്കാനുള്ള ചര്ച്ചകള് തുടങ്ങിക്കഴിഞ്ഞു.
90 അംഗ നിയമസഭയില് 32 മുതല് 44 സീറ്റുകള് വരെ ബിജെപി നേടിയേക്കാമെന്നും കോണ്ഗ്രസിന് 30 മുതല് 42 സീറ്റുകള് വരെ കിട്ടിയേക്കാമെന്നുമാണ് ഏറ്റവും പുതിയ എക്സിറ്റ് പോളുകള് നല്കുന്ന സൂചന. ഹരിയാനയിലും മഹാരാഷ്ട്രയിലും ബിജെപി പടയോട്ടം എന്നതായിരുന്നു വോട്ടെടുപ്പ് പൂര്ത്തിയായതിന് പിന്നാലെ തിങ്കളാഴ്ച പുറത്തുവന്ന പ്രവചനങ്ങള് പറഞ്ഞിരുന്നത്. 2014 ല് ഹരിയാനയില് ബിജെപി 47 സീറ്റുകള് നേടിയിരുന്നു കോണ്ഗ്രസ് 15 സീറ്റുകളില് ഒതുങ്ങുകയും ചെയ്തിരുന്നു. ടൈംസ് നൗവ്വിന്റെ കണക്കുകളില് ഹരിയാനയില് ബിജെപി 71, കോണ്ഗ്രസ് 11, മറ്റുള്ളവര് എട്ട് എന്നതായിരുന്നു സൂചന. ന്യൂസ് 18 നല്കിയ കണക്ക് 75,10,15 എന്നതായിരുന്നു. എബിപി - സി വോട്ടര് 70, എട്ട്, 12, ന്യൂസ് എക്സ് - പോള് സ്ട്രാറ്റ് 75-80, 9-12, 1-4 എന്നിങ്ങനെയായിരുന്നു നേരത്തേ പുറത്തു വന്ന വിവരങ്ങള്.
മഹാരാഷ്ട്രയിലെ കണക്കുകളില് ടൈംസ് നൗ ബിജെപിയ്ക്ക് 230, കോണ്ഗ്രസിന് 48, മറ്റുള്ളവര്ക്ക് 10 എന്നിങ്ങനെയാണ്. ഇന്ത്യാ ടുഡേ-അക്സിസ് 166-194, 72-90, 22-34 എന്നും ന്യൂസ് 18-ഐപിഎസ്ഒഎസ് കണക്കുകളില് 244,39,അഞ്ച് എന്നിങ്ങനെയും എബിപി - സിവോട്ടര് 210,63,15, ന്യുസ് എക്സ് - പോള് സ്ട്രാറ്റ് 188-200, 74-89, 6-10 എന്നുമാണ് പ്രവചിച്ചിരുന്നത്. അതേസമയം ഏറ്റവും പുതിയ പ്രവചനത്തില് 6-10 സീറ്റുകള് വരെ ദുഷ്യന്ത് ചൗട്ടാലയുടെ ജന് നായക് ജനതാ പാര്ട്ടി (ജെജെപി) ഹരിയാനയില് നേടുമെന്ന് സൂചനകളുണ്ട്. മറ്റു പാര്ട്ടികള്ക്കും ഈ സാധ്യത തന്നെയാണ്. അതുകൊണ്ടു തന്നെ ഹരിയാനയില് തൂക്കു പാര്ലമെന്റിനുള്ള സാധ്യതകളാണ് മിക്കവയും പുറത്തു വിടുന്നത്. മൊത്തം വോട്ടു ഷെയറില് ബിജെപി 33 ശതമാനം വോട്ടുകള് നേടുമെന്നാണ് സൂചനകള് കോണ്ഗ്രസ് 32 ശതമാനവും ജെജെപി 14 ശതമാനവും വോട്ടുനേടുമെന്ന് കണക്കാക്കുന്നു.
