മുംബൈ: ബിജെപി-ശിവസേന കൂട്ടുകെട്ട് വന് വിജയം നേടുകയും കോണ്ഗ്രസ് - എന്സിപി സഖ്യം ഗംഭീര തിരിച്ചുവരവ് നടത്തുകയും ചെയ്ത മഹാരാഷ്ട്രയില് ലത്തൂരിലെ ഫലപ്രഖ്യാപനത്തില് കോണ്ഗ്രസ് സ്ഥാനാര്ത്ഥി വിജയിച്ചത് നോട്ടയെ തോല്പ്പിച്ച്. വോട്ടെടുപ്പില് രണ്ടാം സ്ഥാനത്തെത്തിയ നോട്ടയേക്കാള് വെറും 13,000 വോട്ടിന്റെ ഭൂരിപക്ഷം കണ്ടെത്താന് കഴിഞ്ഞതാണ് കോണ്ഗ്രസിന് തുണയായത്.
മഹാരാഷ്ട്രയില് പലയിടത്തും നോട്ട കരുത്തുകാട്ടിയിരുന്നു. മുന് മുഖ്യമന്ത്രി വിലാസ്റാവു ദേശ്മുഖിന്റെ ഇളയമകന് ധീരജ് വിലാസ്റാവു ദേശ്മുഖും ശിവസേനയുടെ സച്ചിന് രവി രാംരാജ് ദേശ്മുഖുമായിരുന്നു ഇവിടെ എതിരാളികള്. എന്നാല് സച്ചിനെ മൂന്നാം സ്ഥാനത്തേക്ക് തള്ളിയിട്ട് നോട്ട ഇവിടെ രണ്ടാം സ്ഥാനം നേടി. 1,69,724 പുരുഷന്മാരും 1,52,336 സ്ത്രീകളും വോട്ടര്മാരായി മൊത്തം 3,22,061 വോട്ടില് 13,5006 വോട്ടുകള് ധീരജ് നേടിയപ്പോള് നോട്ട പിടിച്ചത് 27,500 വോട്ടുകളായിരുന്നു. 13,459 വോട്ടുകളാണ് സച്ചിനു നേടാനായത്.
മൊത്തം വോട്ടിന്റെ 75.10 ശതമാനം വോട്ടുകള് ധീരജ് പിടിച്ചപ്പോള് നോട്ട 13 ശതമാനവും ശിവസേന നാലു ശതമാനവും വോട്ടുകള് നേടി. മഹാരാഷ്ട്ര തെരഞ്ഞെടുപ്പില് ലത്തൂരില് മാത്രമായിരുന്നില്ല നോട്ട ശിവസേനയെ തോല്പ്പിച്ചത്. നേരത്തേ പാലസ് ഗഡഖാവോണ് മണ്ഡലത്തിലും ശിവസേനയെ നോട്ട മൂന്നാം സ്ഥാനത്തേക്ക് തള്ളിയിരുന്നു. സാംഗ്ളി ജില്ലയിലെ ഈ മണ്ഡലത്തില് കോണ്ഗ്രസിന്റെ കദം വിശ്വജിത്ത് 17,1497 വോട്ടുകളുടെ ഭൂരിപക്ഷത്തില് മഹാരാഷ്ട്രയിലെ തന്നെ ഏറ്റവും വലിയ ഭൂരിപക്ഷം കണ്ടെത്തി. ഇവിടെ നോട്ട 20,631 വോട്ടുകള് നേടി. 83 ശതമാനം വോട്ടുകള് കദം നേടിയപ്പോള് 9.9 ശതമാനമാണ് നോട്ട നേടിയ വോട്ടുകള്.
മുംബൈയിലെ ജോഗേശ്വരി ഈസ്റ്റ് മണ്ഡലത്തിലും നോട്ടയ്ക്ക് നല്ലരീതിയില് വോട്ടു കിട്ടി. 12,031 വോട്ടുകളാണ് ഇവിടെ കിട്ടിയത്. ഇതേ മണ്ഡലത്തിലാണ് വിവാദമായ ആരേ കോളനി സ്ഥിതി ചെയ്യുന്നത്. മുംബൈ മെട്രോ കാര്ഷെഡ് പദ്ധതിക്കായി ഇവിടെ 2,185 മരങ്ങള് ഈ മാസം ആദ്യം വെട്ടിക്കളയുകയും ഇതിനെതിരേ പ്രദേശവാസികള് സമരം നടത്തുകയും ചെയ്തിരുന്നു. 27 ട്രൈബല് കോളനികളിലായി 7000 ആദിവാസികളാണ് താമസിക്കുന്നത്. ഇവരും സമരത്തില് പങ്കാളികളായിരുന്നു.
സര്ക്കാര് നടപടിക്കെതിരേ പ്രതിഷേധാര്ഹമായി നോട്ടയ്ക്ക് വോട്ടു ചെയ്യുകയായിരുന്നു. ഇതുമൂലം 58787 വോട്ടുകള്ക്ക് ശിവസേനയുടെ ഇവിടുത്തെ സിറ്റിംഗ് എംഎല്എ രവീന്ദ്ര വെയ്ക്കര് ജയിക്കുകയായിരുന്നു. നോട്ട നല്ല രീതിയില് വോട്ട് പിടിച്ചപ്പോള് കോണ്ഗ്രസിന്റെ സുനില് ബിസാന് കുംരേയാണ് ഇവിടെ പരാജയപ്പെട്ടത്. 2014 ല് ആദ്യമായി നോട്ട അവതരിപ്പിച്ചപ്പോള് മുംബൈ നഗരത്തിലെ നിയോജക മണ്ഡലമായ 4653 വോട്ടുകളും ജോഗേശ്വരി ഈസ്റ്റില് 2,038 വോട്ടുകളും നേടിയിരുന്നു.
