തിരുച്ചിറപ്പള്ളി: തമിഴ്നാട്ടില് കുഴല്ക്കിണറ്റില് വീണ കുട്ടിയെ രക്ഷിക്കാനുള്ള ശ്രമം തുടരുന്നു. കുട്ടിയെ രക്ഷിക്കാന് 12 മണിക്കൂര് കൂടി വേണ്ടി വരുമെന്ന് സര്ക്കാര് വൃത്തങ്ങള് അറിയിച്ചു. ഇതുവരെയുള്ള രക്ഷാപ്രവര്ത്തനം തൃപ്തികരമല്ലെന്നും തമിഴ്നാട് റവന്യു കമ്മീഷണര് ജെ. രാധാകൃഷ്ണന് തുറന്നു സമ്മതിച്ചു. കുട്ടി കുടുങ്ങിയിരിക്കുന്ന ഭാഗത്തേക്ക് സമാന്തര ടണല് കുഴിച്ച് രക്ഷാ പ്രവര്ത്തനം നടത്താനുള്ള ശ്രമം തുടങ്ങിയിരുന്നു. എന്നാല് പ്രദേശത്ത് പാറയായതിനാല് സമാന്തര ടണല് നിര്മ്മിക്കാനുള്ള ശ്രമം വിജയിക്കുന്നില്ല.
വെള്ളിയാഴ്ച വൈകുന്നേരം അഞ്ചരയോടെയാണ് സുജിത്ത് വില്സണ് എന്ന രണ്ടര വയസുകാരന് കുഴല്ക്കിണറ്റില് വീണത്. 30 അടി താഴ്ചയിലാണ് കുട്ടി വീണത്. എന്നാല് ഞായറാഴ്ച വൈകുന്നേരത്തോടെ 90 അടി താഴ്ചയിലേക്ക് കുട്ടി വീണു. കുഴല്ക്കിണറിന് 600 അടി താഴ്ചയുണ്ട്. തിങ്കളാഴ്ച ഉച്ചവരെ 50 അടി മാത്രമേ കുഴിക്കാനായുള്ളൂ. ഇതിനിടെ മഴ പെയ്യാന് തുടങ്ങിയതും രക്ഷാപ്രവര്ത്തനം തടസപ്പെടുത്തുന്നുണ്ട്.
തമിഴ്നാട് ആരോഗ്യ കുടുംബക്ഷേമ മന്ത്രി സി. വിജയഭാസ്കര് സ്ഥലത്ത് ക്യാമ്പ് ചെയ്ത് രക്ഷാപ്രവര്ത്തനത്തിന് മേല്നോട്ടം വഹിക്കുന്നുണ്ട്. സമാന്തര ടണല് നിര്മ്മിക്കുന്നത് കുഴല്ക്കിണറിന് ബലക്ഷയം സംഭവിക്കാനുള്ള സാധ്യതയും അപകടസാധ്യത വര്ദ്ധിപ്പിക്കുന്നു. സമാന്തര ടണല് നിര്മ്മിക്കുന്നതിന്റെ ആഘാതത്തില് കുഴല്ക്കിണറിന് ബലക്ഷയം സംഭവിച്ചാല് കുട്ടി കൂടുതല് താഴ്ചയിലേക്ക് വീഴാന് സാധ്യതയുണ്ട്.
