തൊടുപുഴ: അധ്യാപിക സ്കൂള് പടി ഇറങ്ങിയപ്പോള് ഒരു കൂട്ടം കുട്ടികള് കരഞ്ഞുകൊണ്ട് ഓടിയെത്തി. അധ്യാപക-വിദ്യാര്ത്ഥി ബന്ധത്തിന്റെ ഏറ്റവും മനോഹരമായ കണ്ണു നനയിക്കുന്ന നിമിഷങ്ങളായിരുന്നു കരിങ്കുന്നം ഗവ. എല്പി സ്കൂളില് കാണാനായത്. സ്കൂളിലെ താത്കാലിക അധ്യാപികയായിരുന്നു തൊടുപുഴ ആനക്കൂട് സ്വദേശി കെ ആര് അമൃതയെ തൊടുപുഴ ഉപജില്ലാ വിദ്യാഭ്യാസ ഓഫിസര് എ.അപ്പുണ്ണിയുടെ ഉത്തരവിലൂടെ പുറത്താക്കുകയായിരുന്നു. എന്നാല്, അദ്ധ്യാപിക പടിയിറങ്ങിയപ്പോള് അത് കണ്ടു നിന്ന വിദ്യാര്ത്തികള്ക്ക് സഹിക്കാനായില്ല.
കുട്ടികളെ മാനസികമായും ശാരീരികമായി പീഡിപ്പിക്കുന്നു എന്ന രക്ഷിതാക്കളുടെ പരാതിയുടെ അടിസ്ഥാനത്തില് കരിങ്കുന്നം ഗവ എല്പി സ്കൂള് പ്രധാന അധ്യാപികയെ സസ്പെന്ഡ് ചെയ്തിരുന്നു. കൂടാതെ രണ്ട് താത്കാലിക അധ്യാപകരെ പിരിച്ചുവിടുകയും ചെയ്തു. വിദ്യാഭ്യാസ ഓഫിസര് നേരിട്ടെത്തിയാണ് പ്രധാന അധ്യാപികയെ സസ്പെന്ഡ് ചെയ്തത്. ഇതോടൊപ്പം ദിവസ വേതനക്കാരായ ജിനില കുമാര്, കെ ആര് അമൃത എന്നിവരെയും പിരിച്ച് വിടുകയായിരുന്നു. അമൃത ക്ലാസിലെത്തി കാര്യം പറഞ്ഞ് ഇറങ്ങിയപ്പോഴാ് വിദ്യാര്ത്ഥികള് കരഞ്ഞുകൊണ്ട് പിന്നാലെ ഓടിയെത്തിയത്.
ഇതിന്റെ ദൃശ്യങ്ങള് അധ്യാപികയുടെ ഭര്ത്താവും മറ്റുള്ളവരും ഫോണില് പകര്ത്താന് ശ്രമിച്ചത് രക്ഷിതാക്കള് തടഞ്ഞു. ഇത് സംഘര്ഷമായി. ഇതോടെ കരിങ്കുന്നം പോലീസ് സ്ഥലത്തെത്തി. പ്രധാനാദ്ധ്യാപികയ്ക്കെതിരെ 17 ഓളം പരാതികള് ലഭിച്ചിരുന്നെന്നും ഇവയില് അന്വേഷണം നടത്തി ബോധ്യപ്പെട്ടതിനെ തുടര്ന്നാണ് നടപടി സ്വീകരിച്ചതെന്നും വിദ്യാഭ്യാസ ഓഫീസര് പറഞ്ഞു. താല്ക്കാലി അദ്ധ്യാപകര്ക്കെതിരെയും പരാതികള് ലഭിച്ചിരുന്നെന്നും സ്കൂളിലെത്തി അന്വേഷണം നടത്തി ബോദ്ധ്യപ്പെട്ടതിന്റെ അടിസ്ഥാനത്തിലാണ് നടപടി സ്വീകരിച്ചതെന്നും അദ്ദേഹം പറഞ്ഞു.
എന്നാല്, പിരിച്ചു വിട്ടതായി എ.ഇ.ഒ അറിയിച്ചതിനെ തുടര്ന്ന് സ്കൂളില് നിന്നും പോയ ശേഷം താല്ക്കാലിക അദ്ധ്യാപിക മടങ്ങിയെത്തി മൊബൈലില് ചിത്രികരിക്കുന്നതിനായി കുട്ടികളെ കൊണ്ട് ബോധപൂര്വം വൈകാരിക സാഹചര്യം സൃഷ്ടിക്കുകയായിരുന്നെന്നും പി.ടി.എ ഭാരവാഹികള് പറഞ്ഞു.
