ന്യൂഡല്ഹി: തമിഴ്നാട് തിരുച്ചിറപ്പള്ളിയില് കുഴല്ക്കിണറില് വീണ് സുജിത്ത് എന്ന രണ്ട് വയസ്സുകാരന് മരിച്ചതിന്റെ ആഘാതം വിട്ട് മാറുംമുമ്പേ വീണ്ടും ഒരു കുഴല് കിണര് അപകടമരണം കൂടി. അഞ്ച് വയസ്സുകാരിയാണ് കുഴല്ക്കിണറില് വീണ് മരിച്ചത്. ഹരിയാനയിലെ കര്ണാലിലെ ഗരൗന്ദയിലുള്ള ഹര്സിങ്പുര ഗ്രാമത്തിലുള്ള ശിവാനി എന്ന കുട്ടിയാണ് കുഴല്ക്കിണറിനായി കുത്തിയ കുഴിയില് വീണ് മരിച്ചത്.
അമ്പതടി താഴ്ചയുള്ള കുഴല്ക്കിണറില് കുടുങ്ങിയ കുട്ടിയെ പുറത്തെടുക്കാന് കാര്യക്ഷമമായ രക്ഷാപ്രവര്ത്തനങ്ങള് നടത്തിയെങ്കിലും സാധിച്ചില്ലെന്ന് എഎന്ഐ റിപ്പോര്ട്ട് ചെയ്യുന്നു. ഞായറാഴ്ചയായിരുന്നു കുട്ടി കുഴല്ക്കിണറില് വീണത്. കുട്ടിക്ക് പൈപ്പ് മുഖാന്തിരം ഓക്സിജന് എത്തിച്ചുനല്കാന് രക്ഷാദൗത്യം ദേശീയ ദുരന്ത നിവാരണ സേന ശ്രമിച്ചിരുന്നു.
ഒക്ടോബര് 25നാണ് തിരുച്ചിറപ്പള്ളിയിലെ നാടുകാട്ടുപ്പെട്ടിയില് രണ്ട് വയസ്സുള്ള് സുജിത് കുഴല്ക്കിണറില് വീണത്.കുട്ടിയെ പുറത്തെടുക്കാന് നാലുദിവസത്തോളം നീണ്ട രക്ഷാപ്രവര്ത്തനം നടത്തിയെങ്കിലും കാര്യമുണ്ടായില്ല. രക്ഷാദൗത്യം പുരോഗമിക്കുന്നതിനിടെ, നൂറടിയോളം താഴ്ചയില് വീണ കുട്ടിയുടെ മരണം സ്ഥിരീകരിച്ചു. തുടര്ന്ന് ഒക്ടോബര് 29ന് പുലര്ച്ചെ മൃതദേഹം പുറത്തെടുക്കുകയായിരുന്നു.
