തൃശൂര്: ജില്ലയുടെ വിവിധ ഭാഗങ്ങളില് ഒരു ദിവസം തന്നെ ആറു പെണ്കുട്ടികളെ കാണാതായ സംഭവത്തില് വില്ലന് സോഷ്യല്മീഡിയയെന്ന് റിപ്പോര്ട്ട്. ആറില് അഞ്ചുപേരെയും പോലീസ് കണ്ടെത്തിയതായും സോഷ്യല് മീഡിയ വഴി പരിചയപ്പെട്ട യാളെ നേരില് പരിചയപ്പെടുന്നതിന് ഒളിച്ചോടിയതാണെന്നുമാണ് പോലീസ് നല്കുന്ന വിവരം. ഇനി കണ്ടെത്താനുള്ളത് ചാലക്കുടിയില് നിന്നും കാണാതായ പെണ്കുട്ടിയെ മാത്രം.
കേസുകള് തമ്മില് പരസ്പര ബന്ധമില്ലെന്നും ഓരോന്നും ഒറ്റപ്പെട്ട സംഭവങ്ങളാണെന്നും ഒരേദിവസം തന്നെ വിവിധ സ്റ്റേഷന് പരിധിയില് റിപ്പോര്ട്ട് ചെയ്യപ്പെട്ടു എന്നത് ആകസ്മികതയാണെന്നാണ് പോലീസ് പറയുന്നത്. തൃശൂര് ജില്ലയിലെ ചാലക്കുടി, പാവറട്ടി, അയ്യന്തോള്, പുതുക്കാട്, വടക്കാഞ്ചേരി, മാള എന്നിവിടങ്ങളില് നിന്നുമാണ് പെണ്കുട്ടികളെ കാണാതായത്. അപ്രത്യക്ഷമായവരില് പ്രായപൂര്ത്തിയാകാത്തയാളും ഉണ്ട്.
ഒരാളെ കാസര്ഗോഡ് നിന്നും മറ്റൊരാളെ കൊല്ലത്തു നിന്നുമാണ് കണ്ടെത്തിയത്. അഞ്ചുപേരുടെ വിവരങ്ങളും പോലീസിന് കിട്ടി. ആറാമത്തെ പെണ്കുട്ടിക്കായി തെരച്ചില് തുടങ്ങിയിട്ടുണ്ട്. ഉടന് തന്നെ വിവരം കിട്ടുമെന്നാണ് പോലീസ് പറയുന്നത്. പുതുക്കാട് നിന്നും കാണാതായ പെണ്കുട്ടിയെ കൊല്ലത്തു നിന്നും വടക്കാഞ്ചേരിയില് നിന്നും കാണാതായ പെണ്കുട്ടിയെ കാസര്ഗോഡ് നിന്നുമാണ് പോലീസ് കണ്ടെത്തിയത്.
അഞ്ച് സ്റ്റേഷന് പരിധികളിലാണ് കാണാതായ സംഭവം റിപ്പോര്ട്ട് ചെയ്തിട്ടുള്ളത്. സോഷ്യല് മീഡിയവഴി പരിചയപ്പെട്ട ആണ്കുട്ടികളും പെണ്കുട്ടികളും പരസ്പരം കാണുന്നതിനായി ഒളിച്ചോടിയതാണെന്നാണ് പോലീസ് ഭാഷ്യം. പരസ്പരം അറിയില്ലാത്ത പെണ്കുട്ടികളെ തൃശൂര് സിറ്റി, റൂറല് പോലീസ് പരിധികളില് നിന്നുമാണ് ഒരേ ദിവസം കാണാതായത്. എല്ലാവരും സ്കൂള്, കോളേജ് വിദ്യാര്ത്ഥിനികളാണെന്നും ഒരാള് പ്രായപൂര്ത്തിയാകാത്ത ആളാണെന്നും പോലീസ് പറഞ്ഞിരുന്നു. ഇവരുടെ ഫോണ്നമ്പറുകള് കേന്ദ്രീകരിച്ചായിരുന്നു അന്വേഷണം നടത്തിയത്.
സംഭവങ്ങള് തമ്മില് ബന്ധമില്ലെന്നും ഓരോരുത്തരെയും വ്യത്യസ്ത സാഹചര്യങ്ങളിലാണ് കാണാതായതെന്നും പറഞ്ഞിരുന്നു. പെണ്കുട്ടികളെ കുറിച്ചുള്ള വിവരങ്ങളോ, വിദ്യാഭ്യാസ സ്ഥാപനങ്ങളെക്കുറിച്ചുള്ള വിവരങ്ങളോ പോലീസ് ഇതുവരെ വെളിപ്പെടുത്തിയിട്ടില്ല.
