കെളംബോ : കഴിഞ്ഞ കുറച്ച് വര്ഷങ്ങളായി വിവാദങ്ങളുടെ നടുവിലാണ് ശ്രീലങ്കന് ദേശീയ ടീം. ഈ ആരോപണങ്ങള് ഇല്ലാതാക്കുന്നതിന് വേണ്ടിയുള്ള ശ്രമങ്ങളുമായി ശ്രീലങ്ക. ഇതിന്റെ ഭാഗമായി ഒത്തുകളി രാജ്യത്ത് ക്രിമിനല് കുറ്റമായി പ്രഖ്യാപിച്ചു.
ഇത് സംബന്ധിച്ചുള്ള ബില് കായിക മന്ത്രി ഹരിന് ഫെര്ണാണ്ടോ തിങ്കളാഴ്ച പാര്ലമെന്റില് അവതരിപ്പിച്ചു. മുന് ശ്രീലങ്കന് ക്യാപ്റ്റനും ക്യാബനറ്റ് മന്ത്രിയുമായ അര്ജുന രണതുംഗ പിന്തുണച്ചു. കായികവുമായി ബന്ധപ്പെട്ടുള്ള കുറ്റകൃത്യങ്ങള് തടയുന്ന ബില്ലിന്റെ മൂന്ന് വായനകളും പാര്ലമെന്റ് പാസാക്കി.
ഇതോടെ ഒത്തുകളിയുമായി ബന്ധപ്പെട്ട എല്ലാ പ്രവര്ത്തികളും ക്രിമിനല് കുറ്റമായി. നിയമം ലംഘിക്കുന്നവര്ക്ക് 10 വര്ഷം കഠിന ജയില് ശിക്ഷയും നാല് കോടിയോളം രൂപ പിഴയുമാണ് ശിക്ഷ.
ബില് അനുസരിച്ച് വാതുവെപ്പുകാര് സമീപിക്കുന്നത് റിപ്പോര്ട്ട് ചെയ്യുന്നതില് പരാജയപ്പെട്ടാല് ഉള്ള പ്രവര്ത്തികളും കുറ്റകരമാകും. ഇത്തരം കാര്യങ്ങള് ലങ്കന് താരങ്ങള്ക്ക് ഐസിസിയുടെ അഴിമതി വിരുദ്ധ യൂണിറ്റിന് മാത്രമല്ല ശ്രീലങ്കന് സര്ക്കാര് നിയമിക്കുന്ന പ്രത്യേക അന്വേഷണ യൂണിറ്റിനും റിപ്പോര്ട്ട് ചെയ്യേണ്ടിവരും.
