ന്യൂഡല്ഹി: സനാതന ധര്മ്മം കാത്തുസൂക്ഷിക്കുന്നതിനായി ഹിന്ദുക്കള് പിറന്നാളിന് കേക്ക് മുറിക്കുകയോ മെഴുകുതിരി കത്തിക്കുകയോ ചെയ്യരുതെന്ന് നിര്ദേശവുമായി കേന്ദ്രമന്ത്രി ഗിരിരാജ് സിങ്. സനാതന ധര്മ്മം സംരക്ഷിക്കുന്നതിനായി കുട്ടികളെ രാമായണം, ഗീത, ഹനുമാന് ചാലിസ എന്നിവ പഠിപ്പിക്കണമെന്നും കേന്ദ്രമന്ത്രി ഞായറാഴ്ച രാജ്യതലസ്ഥാനത്ത് നടന്ന ഒരു പരിപാടിക്കിടെ പറഞ്ഞു.
സനാതന ധര്മ്മവും അതിന്റെ മൂല്യങ്ങളും സംരക്ഷിക്കുമെന്ന് കാളിയുടെ പേരില് പ്രതിജ്ഞ ചെയ്യണമെന്നും അദേഹം പറഞ്ഞു. സനാതന ധര്മ്മം സംരക്ഷിക്കുന്നതിനായി എല്ലാവരും മുന്നോട്ടു വരണം. പിറന്നാള് ആഘോഷിക്കുന്ന ഓരോരുത്തരും കേക്ക് മുറിക്കില്ലെന്നും മെഴുകുതിരികള് കത്തിക്കില്ലെന്നും പ്രതിജ്ഞ ചെയ്യണം. പകരം ക്ഷേത്രങ്ങളില് പോയി ശിവനോടും കാളി്യോടും പ്രാര്ത്ഥിക്കണം. മധുരം വിതരണം ചെയ്യണം. നല്ല ഭക്ഷണം ഉണ്ടാക്കണം അദേഹം കൂട്ടിച്ചേര്ത്തു. മെഴുകുതിരികള്ക്കു പകരം മണ്ചിരാതുകള് തെളിക്കണമെന്നും അദേഹം ആവശ്യപ്പെട്ടു.
മിഷണറി സ്കൂളുകളില് പോകുന്ന കുട്ടികള് സനതാന് ധര്മ്മയില് നിന്ന് വ്യത്യസ്തമായി ക്രിസ്ത്യന് രീതികളാണ് പഠിക്കുന്നത്. മറ്റ് മതങ്ങളിലെ വിശ്വാസികള് ഞായറാഴ്ച ആരാധനാലയങ്ങളില് പോകുകയും വെള്ളിയാഴ്ച പ്രാര്ത്ഥന നടത്തുകയും ചെയ്യുന്നു. അവരുടെ മതങ്ങളെക്കുറിച്ച് മക്കളേയും പ്രത്യേകം പരിശീലനവും പഠനവും നല്കുന്നു. എന്നാല് ഹിന്ദു കുട്ടികള് ക്രിസ്തുവിന്റെ പ്രതിമ സ്ഥാപിച്ച മിഷണറി സ്കൂളുകളില് അഡ്മിഷന് എടുക്കുന്നു. തിരികെ വരുമ്പോള് നെറ്റിയില് തിലകക്കുറിയും മറ്റും വേണ്ടെന്ന് പറയുകയും ചെയ്യുന്നുവെന്നും ഗിരിരാജ് സിങ് കൂട്ടിച്ചേര്ത്തു.
