ഒരുകാലത്ത് അഭിനയത്തില് സജീവമായിരുന്ന താരമായിരുന്നു നടി ചന്ദ്ര ലക്ഷ്മണ്. സീരിയലില് മാത്രമല്ല സിനിമയിലും താരം വേഷമിട്ടിട്ടുണ്ട്. സിനിമയില് സജീവമല്ലെങ്കിലും സോഷ്യല് മീഡിയയില് ഏറെ സജീവമാണ് താരം. വിശേഷങ്ങള് പങ്കുവെക്കുന്നതിനോടൊപ്പം പുതിയ ചിത്രങ്ങളും താരം പോസ്റ്റ് ചെയ്യാറുണ്ട്. അഭിനയ മേഖലയില് നിന്ന് താന് ഇടവേള എടുത്തതിനെ കുറിച്ച് ഒരു സ്വകാര്യ മാധ്യമത്തിന് നല്കിയ അഭിമുഖത്തില് ചന്ദ്ര തുറന്ന് പറയുകയാണ്.
'' മലയാളത്തില് അഭിനയിച്ചിട്ട് 9 വര്ഷമായി. തമിഴില് രണ്ടും. മലയാളത്തില് മഴയറിയാതെ എന്ന സീരിയലാണ് അവസാനം ചെയ്തത്. ആ സമയത്ത് തമിഴില് തിരക്കായിരുന്നു. രണ്ട് മൂന്ന് പ്രോജക്ട് ഉണ്ടായിരുന്നു. എല്ലാം ഹിറ്റ്. തെലുങ്കിലും അഭിനയിക്കുന്നുണ്ടായിരുന്നു. അതാണ് മലയാളത്തില് നിന്നും വിട്ട് നിന്നതിന് കാരണം. അല്ലാതെ മനപൂര്വ്വം ഒരു ഇടവേള എടുത്തതല്ല. തമിഴില് 2017-ലാണ് അവസാനമായി അഭിനയിച്ചത്. അച്ഛന്റെ അസുഖവുമായി ബന്ധപ്പെട്ട് ചെറിയ ഒരു ബ്രേക്ക് എടുത്തു. ഒരു വര്ഷം കഴിഞ്ഞ് മടങ്ങി വരാം എന്നായിരുന്നു പ്ലാന്.
പക്ഷേ തമിഴില് നിന്നും മലയാളത്തില് നിന്നും തെലുങ്കില് നിന്നും ഓഫറുകള് വന്നെങ്കിലും പറ്റിയ റോളുകള് കിട്ടിയില്ല. അപ്പോഴെക്കും പുതിയ ആളുകള് ധാരാളം വന്നിരുന്നു. അങ്ങനെ ഇടവേള വീണ്ടും നീണ്ടു. ഇനി സിനിമയില് മതി ഒരു റി എന്ട്രി എന്നാണ് കരുതുന്നത്. സീരിയല് തല്കാലം മാറ്റി വച്ചിരിക്കുന്നു. മലയാളത്തില് മികച്ച ഒരു കഥാപാത്രത്തിലൂടെ തിരിച്ച് വരവ് കൊതിക്കുന്നുണ്ട്. എന്നെ കുറിച്ച് കുറച്ച് ഗോസിപ്പുകളേ വന്നിട്ടുള്ളു എന്നാണ് എനിക്ക് തോന്നുന്നത്.
മേഘത്തില് അഭിനയിക്കുമ്പോള് അഭിമുഖം കൊടുക്കാത്തതിന് ഒരു പ്രസിദ്ധീകരണം ഞാന് വണ്ണം വയ്ക്കുന്നത് കൊണ്ട് തെറാപ്പിക്ക് പോയി എന്നൊക്കെ എഴുതിയിട്ടുണ്ട്. അന്ന് എന്റെ ഭാരം 50 കിലോയാണ് എന്നതാണ് തമാശ. മറ്റൊന്ന് കല്യാണത്തെ കുറിച്ചാണ്. ചന്ദ്ര ലക്ഷ്മണ് അമേരിക്കയില് ഭര്ത്താവിന്റെ പീഡനം സഹിച്ച് ജീവിക്കുന്നു എന്നൊക്കെ എഴുതി. ഞാന് ഇതുവരെ അമേരിക്കയില് പോയിട്ടില്ല. എനിക്ക് ഭര്ത്താവുമില്ല എന്നത് മറ്റൊരു തമാശ. പലപ്പോഴായി ഒന്ന് രണ്ട് റിലേഷന് ഉണ്ടായിരുന്നു. അതൊന്നും വര്ക്കൗട്ട് ആയില്ല. പക്ഷേ ഇപ്പോഴും ഞങ്ങള് നല്ല സുഹൃത്തുക്കളാണ്.
പിന്നെ ആളുകള് പറയും പോലെയല്ലല്ലോ ജീവിക്കേണ്ടത്. വിവാഹവും അങ്ങനെ തന്നെ. എനിക്ക് തോന്നുമ്പോള് അത് സംഭവിക്കും. കൊച്ചിയിലെ വീട് വിറ്റിട്ടാണ് ഞങ്ങള് ചെന്നൈയില് ഫ്ളാറ്റ് വാങ്ങുന്നത്. പക്ഷേ കുറേ പ്രശ്നങ്ങള് ഉണ്ടായി. ആ ഫ്ളാറ്റില് താമസിക്കാന് തുടങ്ങിയ ശേഷം ഞങ്ങള് മൂന്ന് പേര്ക്കും അപകടങ്ങള് ഉണ്ടായി. തലനാരിഴയ്ക്കാണ് രക്ഷപ്പെട്ടത്. ഇപ്പോള് ജീവിച്ചിരിക്കുന്നത് ഭാഗ്യം. ഞാന് ആറാം ക്ലാസില് പഠിക്കുമ്പോഴാണ് സൈക്കിളില് വീട്ടിലേക്ക് പോകുമ്പോള് വീണ് തലയിടിച്ചത്. ഒരു കാര് തൊട്ടടുത്ത് എത്തി ബ്രേക്ക് ചെയ്തില്ലായിരുന്നെങ്കില് ദുരന്തം ഉറപ്പായിരുന്നു. പിന്നീട് നോക്കിയപ്പോള് ആ വീട്ടില് വാസ്തുവിന്റെ പ്രശ്നങ്ങള് കണ്ടു. ഒടുവില് അത് വിറ്റു. പിന്നീട് സ്വന്തമായി വീട് വാങ്ങിയില്ല. ഇപ്പോഴും അഡയാറില് ഒരു വാടക വീട്ടിലാണ് തമാസം'' - ചന്ദ്ര ലക്ഷ്മണ് പറയുന്നു
