കൊച്ചി : തന്നില് വിശ്വാസമര്പ്പിച്ചിരിക്കുന്ന കഥാപാത്രത്തെ കുറിച്ച് ചിന്തിക്കാതെ തല മൊട്ടയടിച്ച ഷെയിന് നിഗത്തിന്റെ നടപടി തികച്ചും തോന്ന്യാസമെന്ന് 'അമ്മ' ഭാരവാഹിയും എംഎല്എയുമായ കെ.ബി ഗണേശ് കുമാര്. ഒരു നിര്മാതാവിന് നഷ്ടമുണ്ടാക്കുന്ന നടപടിയാണ് ഷെയിന്റെ ഭാഗത്തു നിന്നും ഉണ്ടായത്. ഒപ്പം ഒരു സംവിധായകന്റെ കണ്ണീരും.
ജീവിതത്തില് ആദ്യമായി ഒരു ചിത്രം സംവിധാനം ചെയ്യാന് അവസരം കിട്ടിയ ഒരു ചെറുപ്പക്കാരന്റെ വേദനയുണ്ട്. അയാളെ കുറിച്ച് ആരും എന്താണ് ഒന്നും പറയാത്തത്.
പണ്ടു കാലം മുതല് സിനിമാ പ്രവര്ത്തകരില് പലരും മദ്യപിച്ചിരുന്നുവെങ്കിലും അത് അവരുടെ ജോലിയെ ഒരിക്കല്പ്പോലും ബാധിച്ചിരുന്നില്ല. എന്നാല്, ഇന്നത്തെ സെറ്റുകളില് മയക്കുമരുന്ന് ഉപയോഗം വ്യാപകമാണെന്നും ഗണേശ് കുമാര് കൂട്ടിച്ചേര്ത്തു.
ലൊക്കേഷനിലേയ്ക്ക് വരാന് വൈകുക, വന്നുകഴിഞ്ഞാല് തന്നെ കാരവനില് നിന്നും ഇറങ്ങാന് പോലും മടിയാണ് ചിലര്ക്ക്. ഇത്തരം പരാതികളൊക്കെ അമ്മയില് വരുന്നുണ്ട്. പോലീസുകാര്ക്ക് സെറ്റില് കയറി പരിശോധിക്കുന്ന നടപടി പ്രായോഗികമല്ല. എന്നാല് പോലീസും എക്സൈസ് സംഘരും ഒരു ഷാഡോ പോലീസിങ് സംവിധാനം ഉണ്ടാക്കിയാല് ഇതിന് പരിഹാരമാകുമെന്നും ഗണേശ് കുമാര് പറഞ്ഞു.
