ന്യൂഡല്ഹി: അയോധ്യാ കേസിലെ സുപ്രീം കോടതി വിധിക്കെതിരെ ഹിന്ദു മഹാസഭ പുനഃപരിശോധനാ ഹര്ജി നല്കി. മുസ്ലീങ്ങള്ക്ക് പള്ളി പണിയാന് അയോധ്യയില് അഞ്ച് ഏക്കര് ഭൂമി നല്കണമെന്ന ഉത്തരവിനെതിരെയാണ് ഹര്ജി.
അയോധ്യാ കേസിലെ മുസ്ലീം കക്ഷികളില് ആരും പള്ളി പണിയാന് പകരം ഭൂമി ആവശ്യപ്പെട്ടിട്ടില്ലെന്ന് ഹിന്ദു മഹാസഭ ഹര്ജിയില് ചൂണ്ടിക്കാട്ടി. മുസ്ലീങ്ങള് ഇങ്ങനെ ആവശ്യപ്പെട്ടിട്ടില്ലാത്ത സാഹചര്യത്തില് കോടതിക്ക് ഇത്തരത്തില് തീര്പ്പുകല്പ്പിക്കാനാകില്ലെന്നും വിഷ്ണു ശങ്കര് ജെയ്ന് മുഖേന സമര്പ്പിച്ച ഹര്ജിയില് ഹിന്ദു മഹാസഭ ചൂണ്ടിക്കാട്ടുന്നു.
1934ലും 1949ലും 1992ലും ഹിന്ദുക്കള് തെറ്റായി പ്രവര്ത്തിച്ചുവെന്നും അതിന് പരിഹാരമായി അയോധ്യയില് അഞ്ച് ഏക്കര് സ്ഥലം പള്ളി പണിയാന് നല്കണമെന്നുമാണ് വിധിയില് പറയുന്നത്. എന്നാല് ഇത്തരത്തിലൊരു ആശ്വാസ നടപടിക്ക് നിയമപരമായ പ്രാബല്യമില്ലെന്ന് ഹര്ജിക്കാര് ആരോപിക്കുന്നു.
നിയമവിരുദ്ധമായ പ്രവൃത്തിക്ക് വേണ്ടി ഹിന്ദുക്കളുടെ ഭൂമി കൈമാറാനാകില്ലെന്നും ഹര്ജിയില് പറയുന്നു. മുസ്ലീങ്ങള് അവരുടെ ഹര്ജിയില് ഉന്നയിക്കാത്ത ഒരു ആവശ്യം അംഗീകരിക്കുന്നതിന് കോടതിക്ക് ഭരണഘടനയുടെ 142-ാം അനുചേ്ഛദം ഉപയോഗിക്കാനാകില്ലെന്നും ഹിന്ദു മഹാസഭ ആരോപിച്ചു.
