റായ്പൂര്: കൂട്ടബലാത്സംഗക്കേസുകള് കൊണ്ട് അന്താരാഷ്ട്രവേദിയില് നാണം കെട്ടിരിക്കുന്ന ഇന്ത്യയില് ഏറ്റവും പുതിയ കേസ് ഛത്തീസ് ഗഡില് നിന്നും. കൂട്ട ബലാത്സംഗം ചെയ്ത ശേഷം കഴുത്തുഞെരിച്ച് കൊലപ്പെടുത്താന് ശ്രമിക്കുകയും അബോധാവസ്ഥയിലായതിനെ തുടര്ന്ന് ഇരയെ വഴിയില് ഉപേക്ഷിക്കുകയും ചെയ്ത നാലു പേര് അറസ്റ്റിലായി. ഛത്തീസ് ഗഡിലെ രാജനന്ദഗാവില് നടന്ന സംഭവത്തില് 20 കാരിയാണ് കൂട്ടബലാത്സംഗത്തിന് ഇരയായത്. ബലാത്സംഗത്തിന് ശേഷം പെണ്കുട്ടിയെ ശ്വാസം മുട്ടിച്ചു കൊലപ്പെടുത്താനും ശ്രമം നടന്നു.
നാലു പ്രതികളും പിടിയിലായിട്ടുണ്ട്. എല്ലാവരും കൗമാരം പിന്നിടാത്തവരാണ് എന്നതാണ് ഞെട്ടിക്കുന്നത്. പെണ്കുട്ടിയുടെ ബന്ധുവിന്റെ വീട്ടില് ഒരു ചടങ്ങിനായി എത്തിയപ്പോഴായിരുന്നു അക്രമം. ഒരാഴ്ച കഴിഞ്ഞ് യുവതി പരാതി നല്കി. 19 നും 20 നും ഇടയില് പ്രായക്കാരാണ് മുഴുവന് പ്രതികളും. ഡിസംബര് 2 ന് അടുത്ത ഗ്രാമത്തില് താമസിക്കുന്ന അമ്മാവന്റെ വീട്ടിലെ ചടങ്ങിന് എത്തിയപ്പോഴായിരുന്നു അക്രമത്തിന് ഇരയായത്. ചടങ്ങ് കഴിഞ്ഞ് ബാക്കി വന്ന ആഹാരാവശിഷ്ടങ്ങള് മറവ് ചെയ്യുന്നതിനിടയില് പ്രതികള് പതുങ്ങിയിരുന്ന് ആക്രമിക്കുകയായിരുന്നു. നാലു പേര് ചേര്ന്ന് യുവതിയെ പിടകൂടുകയും ആളൊഴിഞ്ഞ പ്രദേശത്തേക്ക് കൊണ്ടുപോയി മുഖത്ത് തുണിയിട്ട് ബലാത്സംഗം ചെയ്യുകയുമായിരുന്നു.
യുവതി രക്ഷയ്ക്കായി അലറി വിളിച്ചെങ്കിലും ഉച്ചത്തില് പാട്ട് വെച്ചിരുന്നതിനാല് വിളി ആരും കേട്ടില്ല. പീഡനത്തിന് ശേഷം പ്രതികള് യുവതിയെ കൊല്ലാന് കഴുത്തു ഞെരിച്ചു. തുടര്ന്ന് യുവതി അബോധാവസ്ഥയിലാകുകയും മരിച്ചെന്ന് കരുതി നാലു പേരും ഉപേക്ഷിച്ച് പോകുകയും ചെയ്തു. അല്പ്പം കഴിഞ്ഞു ബോധം വീണ്ടുകിട്ടിയ യുവതി തിരികെ അമ്മാവന്റെ വീട്ടിലെത്തിയെങ്കിലും സംഭവം ആരോടും പറഞ്ഞില്ല. എന്നാല് ഞായറാഴ്ച കുറ്റവാളികളെ നിയമത്തിന് മുമ്പില് കൊണ്ടുവരണമെന്ന് നിശ്ചയദാര്ഡ്യം എടുത്ത യുവതി വിവരം മാതാപിതാക്കളോട് പറയുകയും അവര് പോലീസില് പരാതി നല്കുകയുമായിരുന്നു. തുടര്ന്നാണ് നാലുപേരെയും പോലീസ് പൊക്കിയത്്.
