മലപ്പുറം : സംസ്ഥാനത്ത് ഹര്ത്താലില് അങ്ങിങ് അക്രമം. വാഹനങ്ങള് തടയാന് ശ്രമിച്ചതിന് 278 പേരെ പോലീസ് കസ്റ്റഡിയിലെടുത്തു. 184 പേര് കരുതല് തടങ്കലിലാണ്.
കൊല്ലത്ത് മുഖംമൂടി സംഘം കെ.എസ്.ആര്.ടി.സി ബസ് എറിഞ്ഞു തകര്ത്തു. മട്ടന്നൂരില് ഓട്ടോറിക്ഷയ്ക്കു നേരെ ആക്രമണം. ഡ്രൈവര്ക്കും യാത്രക്കാരനും പരിക്കേറ്റു.
ഹര്ത്താല് അനുകൂലികള് തിരുവനന്തപുരത്ത് നടത്തിയ മാര്ച്ചില് സംഘര്ഷം. പ്രവര്ത്തകര് ബാരിക്കേഡുകള് മറിച്ചിടാന് ശ്രമിച്ചതോടെ പോലീസ് ജലപീരങ്കി പ്രയോഗിച്ചു.
കണ്ണൂരില് ഹര്ത്താല് അനുകൂലികള് ലോറി തടഞ്ഞ് താക്കോല് ഊരിയെടുത്ത് ഓടി. താക്കോല് തിരികെ കിട്ടാത്തതിനാല് ലോറി ദേശീയപാതയുടെ ഓരത്തേക്ക് തള്ളിനീക്കിയിട്ടിരിക്കുകയാണ്. സംഭവത്തില് ഒരാളെ പോലീസ് പിടികൂടിയിട്ടുണ്ട്.
കോട്ടയം ജില്ലയില് ഹര്ത്താല് പൊതുവേ സമാധാനപരം. മുണ്ടക്കയത്തും ചങ്ങനാശേരിയിലും വണ്ടി തടയാന് ശ്രമിച്ച എസ്ഡിപിഐ പ്രവര്ത്തകരെ പോലീസ് അറസ്റ്റു ചെയ്തു. മുണ്ടക്കയത്ത് രണ്ടുപേരെയും ചങ്ങനാശ്ശേരിയില് ഒരാളെയുമാണ് അറസ്റ്റു ചെയ്തത്.
ജില്ലയില് കെ.എസ്.ആര്.ടി.സി ബസുകള് സമാധാനപരമായി സര്വീസ് നടത്തുന്നുണ്ട്. അതേസമയം സ്വകാര്യ ബസുകള് സര്വീസ് നടത്തുന്നില്ല.
സ്കൂളുകളില് പരീക്ഷകള് നടക്കുന്നുണ്ട്. എന്നാല്, ചില സ്കൂളുകള് പരീക്ഷ മാറ്റി.
കോട്ടയം നഗരത്തില് ഏതാനും കടകളും ഹോട്ടലുകളും തുറന്നു പ്രവര്ത്തിക്കുന്നുണ്ട്. കാറുകളും ഇരുചക്ര വാഹനങ്ങളും തടസമില്ലാതെ ഓടുന്നുണ്ട്.
