തിരുവനന്തപുരം: പൗരത്വ ഭേദഗതി ബില്ലിനെതിരേ ഹര്ത്താല് അനുകൂലികള് തിരുവനന്തപുരത്തും കോഴിക്കോട്ടും നടത്തിയ മാര്ച്ചില് സംഘര്ഷം. തിരുവനന്തപുരത്ത് എസ്ഡിപിഐ നടത്തിയ മാര്ച്ചിലുണ്ടായ കല്ലേറില് ഒരു വഴിയാത്രക്കാന് പരിക്കേറ്റു. ബാരിക്കേഡ് തകര്ക്കാന് ശ്രമിച്ചവര്ക്ക് നേരെ പോലീസ് ജലപീരങ്കി പ്രയോഗിച്ചു. ഹര്ത്താലിനെതിരേ പോലീസ് കര്ശന നടപടിയാണ് എടുത്തിരിക്കുന്നത്.
തിരുവനന്തപുരത്ത് ഏജീസ് ഓഫീസിന് മുന്നില് രാവിലെ സമരാനുകൂലികള് ബാരിക്കേഡ് തകര്ക്കാന് ശ്രമിച്ചത് സംഘര്ഷത്തില് കലാശിച്ചു. പോലീസ് രണ്ടു വട്ടം ജലപീരങ്കി പ്രയോഗിച്ചു. എജീസ് ഓഫീസിലേക്ക് മാര്ച്ച് നടത്തുമെന്നാണ് നേരത്തേ എസ്ഡിപിഐ പ്രഖ്യാപിച്ചിരുന്നു. ഓവര്ബ്രിഡ്ജില് നിന്നും പ്രകടനം പോകുന്ന വഴിയില് ചില കടകള് അടപ്പിക്കാന് ശ്രമം നടത്തിയതാണ് കല്ലേറില് എത്തിയത്. തുറന്നു വെച്ച കടകള്ക്ക് നേരെയുണ്ടായ കല്ലേറില് വഴിയരികില് കാത്തു നില്ക്കുകയായിരുന്ന യുവാവിന് പരിക്കേറ്റു. പോലീസ് പെട്ടെന്ന് തന്നെ ഇയാള്ക്ക് ചികിത്സ നല്കി. കല്ലേറില് സ്കൂട്ടര് യാത്രക്കാരനും പരിക്കേറ്റിട്ടുണ്ട്.
കോഴിക്കോട് സ്ത്രീകള് അടക്കമുള്ള പ്രവര്ത്തകരെ പോലീസ് അറസ്റ്റ് ചെയ്ത് മാറ്റാന് ശ്രമിച്ചത് സംഘര്ഷത്തില് കലാശിച്ചു. മുപ്പതോളം എസ്ഡിപിഐ പ്രവര്ത്തകരെയാണ് പോലീസ് അറസ്റ്റ് ചെയ്തത്. സ്ത്രീകള് ഉള്പ്പെടെയുള്ള സമരാനുകൂലികള് കണ്ണൂര് കെഎസ്ആര്ടിസി ബസ് സ്റ്റാന്റിന് സമീപം ദേശീയപാത ഉപരോധിച്ചു. പുരുഷന്മാരെ പോലീസ് അറസ്റ്റ് ചെയ്ത് നീക്കി. രാവിലെ എട്ടു മണിക്ക് വെല്ഫെയര് പാര്ട്ടി പ്രവര്ത്തകരാണ് ദേശീയപാത ഉപരോധിച്ചത്. അറസ്റ്റിന് വഴങ്ങാതെ രണ്ടു സ്ത്രീകള് വഴിയില് കിടന്നു പ്രതിഷേധിച്ചു. ഇവരെ പിന്നീട് പണിപ്പെട്ടു മാറ്റി.
കണ്ണൂരില് ഹര്ത്താല് അനുകൂലികള് ലോറി തടഞ്ഞു താക്കോല് ഊരിയെടുത്ത് ഓടി. ടയറിന്റെ കാറ്റഴിച്ചുവിടാന് ശ്രമിച്ച് പരാജയപ്പെട്ടതോടെയാണ് താക്കോല് ഊരിക്കൊണ്ട് ഓടിയത്. താക്കോല് തിരികെ കിട്ടാഞ്ഞതിനാല് ഓരത്തേക്ക് വാഹനം തള്ളി നീക്കി നിര്ത്തിയിരിക്കുകയാണ്. കര്ണാടക റജിസ്ട്രേഷനിലുള്ള ലോറിയാണ് സംഘം തടഞ്ഞത്. കൊച്ചിയില് ലോഡ് ഇറക്കിയ ശേഷം മംഗലുരുവിലേക്ക് പോകുന്ന ലോറിയായിരുന്നു. നാട്ടുകാര് വന്നതോടെ സംഘം ഓടി. ഒരാളെ പിടികൂടാന് കഴിഞ്ഞിട്ടുണ്ടെങ്കിലും താക്കോല് തിരികെ കിട്ടിയിട്ടില്ല.
