ന്യൂഡല്ഹി: പൗരത്വ ഭേദഗതി നിയമവുമായി ബന്ധപ്പെട്ട് പ്രതിഷേധം തുടരുന്ന സാഹചര്യത്തില് ഡല്ഹി നഗരത്തിലെ മൂന്നിടത്ത് നിരോധനാജ്ഞ. ജാമിയ വിദ്യാര്ത്ഥികളുടെ ഉപരോധസമരം കണക്കിലെടുത്ത് ഡല്ഹി നഗരത്തില് സിലംപൂര്, ജാഫ്രാബാദ്, ചാണക്യപുരിയിലെ യുപിഭവന് എന്നിവിടങ്ങളിലാണ് നിരോധനാജ്ഞ ഏര്പ്പെടുത്തിയിരിക്കുന്നത്. വെള്ളിയാഴ്ച നമസ്ക്കാരം കണക്കിലെടുത്ത് ഡല്ഹി ജമാമസ്ജിദ് പരിസരത്തും സുരക്ഷ വര്ദ്ധിപ്പിച്ചിട്ടുണ്ട്.
പൗരത്വ ഭേദഗതി നിയമത്തിനെതിരേ നടന്നു വരുന്ന സമരത്തിന് മുന്നിലേക്ക് ഇന്ന് ഡിവൈഎഫ്ഐ കൂടി എത്തിയിട്ടുണ്ട്. സമരത്തിന്റെ വീര്യം കുറഞ്ഞെന്ന വിലയിരുത്തല് ഉണ്ടെങ്കിലും പ്രതിഷേധ മാര്ച്ചില് നിന്നും പിന്നോട്ടില്ലെന്ന നിലപാടിലാണ് പ്രതിഷേധക്കാര്. യുപി ഭവന് ഉച്ചകഴിഞ്ഞ് 3 മണിക്ക് കഴിഞ്ഞ വെള്ളിയാഴ്ചയായിരുന്നു സമരങ്ങള് തുടങ്ങിയത്. അതുകൊണ്ടു തന്നെ മസ്ജിദുകള് കേന്ദ്രീകരിച്ച് സുരക്ഷ കൂട്ടിയിട്ടുണ്ട്. ഡല്ഹി ജമാമസ്ജിദില് അര്ദ്ധ സൈനികരെ അടക്കമാണ് വിന്യസിപ്പിച്ചിരിക്കുന്നത്. സുരക്ഷയുടെ ഭാഗമായി പോലീസുകാരുടെ എണ്ണം കൂട്ടിയിട്ടുണ്ട്.
സമരം സംഘര്ഷത്തിലേക്ക് കടന്നാല് പോലീസ് ഇടപെടല് ഉണ്ടാകുമെന്നാണ് പോലീസ് നല്കിയിരിക്കുന്ന മുന്നറിയിപ്പ്. ഒരാഴ്ചയായി യുപി ഭവന് പരിസരത്തും ചെറിയ രീതിയില് സമരങ്ങള് നടന്നു വരുന്നുണ്ട്. കഴിഞ്ഞ ദിവസം ഡല്ഹിയില് പ്രഖ്യാപിച്ചിരുന്ന ജാമിയ വിദ്യാര്ത്ഥികളുടെ പ്രതിഷേധം നേരത്തേ തന്നെ വിദ്യാര്ത്ഥികളെ കസ്റ്റഡിയില് എടുത്ത് പോലീസ് പ്രതിരോധിക്കുകയായിരുന്നു. 27 പേരുടെ മരണമാണ് ഇതുവരെ സംഘര്ഷവുമായി ബന്ധപ്പെട്ട് പോലീസ് ഏര്പ്പെടുത്തിയിരിക്കുന്നത്. ഉത്തര്പ്രദേശിന്റെ പല ഭാഗങ്ങളിലും പ്രതിഷേധങ്ങള് ഉണ്ടായേക്കുമെന്ന മുന്നറിയിപ്പിനെ തുടര്ന്ന സുരക്ഷ വര്ദ്ധിപ്പിച്ചിട്ടുണ്ട്.
സംസ്ഥാനത്ത് ഉടനീളം യുപി സര്ക്കാരും സുരക്ഷ കൂട്ടിയിട്ടുണ്ട്. ലഖ്നൗ ഉള്പ്പെടെ ഉത്തര്പ്രദേശിലെ പ്രശ്നബാധിത പ്രദേശങ്ങളായ 12 ജില്ലകളില് ഇന്റര്നെറ്റ് നിരോധനമാണ്. സംഘര്ഷ മേഖലകളില് ഡ്രോണ് നിരീക്ഷണം ഏര്പ്പെടുത്താനും തീരുമാനമുണ്ട്. പടിഞ്ഞാറന് നഗരങ്ങളായ ബിജ്നോര്, ബുലന്ദ്ഷഹര്, മുസാഫര്നഗര്, മീററ്റ്, ആഗ്ര, ഫിറോസാബാദ്, സംഭാല്, അലിഗഡ്, ഗസിയാബാദ്, രംപൂര്, സീതാപൂര്, കാണ്പൂര് എന്നിവിടങ്ങളിലെല്ലാം ഇന്റര്നെറ്റ് നിരോധനമുണ്ട്.
ആഗ്രയില് രാവിലെ എട്ടു മണി മുതല് വൈകിട്ട ആറ് വരെയാണ് ഇന്റര്നെറ്റ് നിരോധനം കൊണ്ടുവന്നിരിക്കുന്നത്. ശനിയാഴ്ച പുലര്ച്ചെയെ ബുലന്ദ്ഷഹറില് നിരോധനം നീക്കൂ. ഗൊരഖ്പൂരീലെ പ്രശ്നബാധിത പ്രദേശങ്ങളില് പോലീസ് ഫ്ളാഗ് മാര്ച്ചും എല്ലാസ്റ്റേഷന് ഏരിയകളിലും സമാധാന കമ്മറ്റികളുടെ യോഗങ്ങളും ചേര്ന്നു. ഡിസംബര് 19 നും 21 നും ഉണ്ടായ കലാപത്തില് ഇതുവരെ 21 പേരുടെ ജീവനാണ് യുപിയില് മാത്രം പൊലിഞ്ഞത്. പലരുടെയും ശരീരത്തില് വെടിയേറ്റ പാടുണ്ടായിരുന്നു. പോലീസ് പറയുന്നത് വെടിവെച്ചിട്ടില്ലെന്ാണ്.
ഇതുവരെ 327 കേസുകള് റജിസ്റ്റര് ചെയ്ത പോലീസ് 5,558 പ്രതിരോധ അറസ്റ്റുകളാണ് ഇതുവരെ നടത്തിയത്്. കഴിഞ്ഞദിവസം കലാപത്തെ ഫലപ്രദമായി തടഞ്ഞ പോലീസിനെ പ്രധാനമന്ത്രി അഭിനന്ദിച്ചിരുന്നു.
