ന്യൂഡല്ഹി: ചൂറ്റും കിടക്കുന്ന മൂന്ന് ഇസ്ളാമിക രാജ്യങ്ങളിലെ ന്യൂനപക്ഷ വിഭാഗത്തില് പെട്ടവര് ഇവിടെയല്ലാതെ പിന്നെ എങ്ങോട്ട് പോകുമെന്ന് കോണ്ഗ്രസിനെ വിമര്ശിച്ച കേന്ദ്രമന്ത്രി കൃഷ്ണറെഡ്ഡി. അവര്ക്ക് പൗരത്വം നല്കുന്നത് നമ്മുടെ ധാര്മ്മിക ഉത്തരവാദിത്വം ആണെന്നും ഇവിടെ അല്ലെങ്കില് പിന്നെ അവര് ഇറ്റലിയിലേക്ക് പോയാല് മതിയോ എന്നും കൃഷ്ണ റെഡ്ഡി ചോദിക്കുന്നു. പൗരത്വ ഭേദഗതി നിയമത്തെ എതിര്ക്കുന്ന കോണ്ഗ്രസിനെ രൂക്ഷമായ ഭാഷയിലാണ് ആഭ്യന്തര സഹമന്ത്രി വിമര്ശിച്ചത്.
''പാകിസ്താനിലും അഫ്ഗാനിസ്ഥാനിലും ബംഗ്ളാദേശിലും പീഡനം നേരിടുന്നവര് ഇന്ത്യയിലേക്ക് വന്നില്ലെങ്കില് പിന്നെ അവര് എവിടെപോകും? ഇറ്റലിയിലേക്ക് പോകണോ?'' കൃഷ്ണറെഡ്ഡി ചോദിക്കുന്നു. '' ഇറ്റലി ഹിന്ദുക്കളെയും സിഖുകാരെയും സ്വീകരിക്കില്ല. കാരണം അവര് പാവപ്പെട്ടവരാണ്.'' പാകിസ്താന് ഹിന്ദുക്കളും സിഖുകാരും ക്രിസ്ത്യാനികളും ജൈനരും ഭാരമാണ്. അയല് രാജ്യങ്ങളില് ഈ ജനതയുടെ എണ്ണം 30 ശതമാനത്തില് നിന്നും കുറഞ്ഞുകുറഞ്ഞു വരികയാണ്. ഈ മൂന്ന് മുസ്ളീം രാജ്യങ്ങളിലുള്ള ഇസ്ളാമികളല്ലാത്തവര്ക്ക് അഭയവും പൗരത്വവും നല്കേണ്ടത് ഇന്ത്യയുടെ ധാര്മ്മിക ഉത്തരവാദിത്വമാണ്.
പ്രതിപക്ഷം ഹീനമായ രാഷ്ട്രീയം കളിക്കുകയാണ്. പൗരത്വ ഭേദഗതി നിയമം വളച്ചൊടിച്ച് പ്രകോപനം ഉണ്ടാക്കാനാണ് ചിലരുടെ ശ്രമമെന്നും പറഞ്ഞു. നേരത്തേ കേന്ദ്രമന്ത്രി ഗിരിരാജ് സിംഗും കോണ്ഗ്രസിനെ വിമര്ശിച്ച് രംഗത്ത് വന്നിരുന്നു. രാജ്യം വിഭജിക്കാനാണ് കോണ്ഗ്രസിന്റെ ശ്രമം എന്നായിരുന്നു ആരോപണം. പൗരത്വ നിയമത്തെക്കുറിച്ച് നുണയും തെറ്റിദ്ധാരണകളും പരത്തുകയാണെന്നും നുഴഞ്ഞുകയറ്റക്കാരോടാണ് രാഹുല് ഗാന്ധിക്ക് സ്നേഹമെങ്കില് അവരെ ഇറ്റലിയിലേക്ക് കൊണ്ടുപോകട്ടെയെന്നും പറഞ്ഞു.
രാഹുല്ഗാന്ധി കേന്ദ്രത്തെ വിമര്ശിച്ചതിന് പിന്നാലെയായിരുന്നു സിംഗിന്റെ പരാമര്ശവും വന്നത്. നേരത്തേ പൗരത്വ നിയമം പാവപ്പെട്ടവന് ബാദ്ധ്യത ഉണ്ടാക്കുന്നതാണെന്ന് രാഹുല് വിമര്ശിച്ചിരുന്നു. പൗരത്വ നിയമം, ദേശീയ പൗരത്വ റജിസ്റ്റര്, ദേശീയ ജനസംഖ്യാ റെക്കോഡ് എന്നിവ 'രണ്ടാം നോട്ടു നിരോധനം' ആണെന്നായിരുന്നു രാഹുലിന്റെ വിമര്ശനം. ഈ പരിപാടികള് നോട്ട് നിരോധനത്തെക്കാളും വിനാശകാരിയെന്നായിരുന്നു രാഹുലിന്റെ പരാമര്ശം. അപക്വമായ പ്രസ്താവന എന്നായിരുന്നു ഇതിനെ കിഷന് റെഡ്ഡി വിമര്ശിച്ചത്.
പൗരത്വ നിയമവും ജിഎസ്ടിയും തമ്മിലുള്ള വ്യത്യാസം അറിയില്ലെങ്കില് രാഹുല്ഗാന്ധി നന്നായിട്ട് ഈ വിവരങ്ങളെക്കുറിച്ച് ജ്ഞാനമുള്ള ഒരു ട്യൂട്ടറുടെ കീഴില് ട്യൂഷന് പോകട്ടെ എന്നായിരുന്നു കൃഷ്ണ റെഡ്ഡിയുടെ വിമര്ശനം. അതുപോലെ തന്നെ രാഹുലിന് എന്ആര്സിയും എന്പിആറും എന്താണെന്ന് പോലും അറിയില്ലെന്നും പറഞ്ഞു.
