ലഖ്നൗ: പൗരത്വ നിയമ ഭേദഗതിക്കെതിരെ സമരം ചെയ്തവര്ക്ക് പെന്ഷന് വാഗ്ദാനം ചെയ്ത് സമാജ്വാദി പാര്ട്ടി. ഉത്തര്പ്രദേശില് ബി.ജെ.പിക്കുള്ള ശക്തമായ തിരിച്ചടനല്കി, സമാജ്വാദി പാര്ട്ടിയുടെ തിരിച്ചുവരവിനായി വോട്ടു ചെയ്താന് പെന്ഷന് നല്കുമെന്നാണ് പ്രതിപക്ഷ നേതാവ് രാം ഗോവിന്ദ് ചൗധരി വ്യക്തമാക്കിയത്. പ്രതിഷേധത്തിന്റെ ഭാഗമായി കൊല്ലപ്പെടുകയോ ജയിലില് പോവുകയോ ചെയ്തവരുടെ കുടുംബത്തിന് ധനസഹായം നല്കുമെന്നും അദ്ദേഹം വ്യക്തമാക്കി.
സമാജ്വാദി പാര്ട്ടി കേന്ദ്രത്തിലും യു.പിയിലും അധികാരത്തിലെത്തയാല് ജനാധിപത്യവും ഭരണഘടനയും സംരക്ഷിക്കുന്നതിന് വേണ്ടി പോരാടിയവര്ക്ക് പെന്ഷന് നല്കും. അഭയം തേടി വരുന്നവര്ക്ക് സംരക്ഷണമൊരുക്കും. സംരക്ഷണം തേടി വരുന്നവരെല്ലാം സംരക്ഷിക്കും. -രാം ഗോവിന്ദ് ചൗധരി വെള്ളിയാഴ്ച മാധ്യമങ്ങളോട് പറഞ്ഞു.
അതേസമയം, രാം ഗോവിന്ദ് ചൗധരിയെ വിമര്ശിച്ച് ബി.ജെ.പി രംഗത്തെത്തി. കലാപകാരികളെയും സാമൂഹ്യ വിരുദ്ധരെയും ആദരിക്കുന്നത് അവരുടെ പാര്ട്ടിയുടെ ജനിതക ഗുണമാണെന്ന് ബി.ജെ.പി നേതാവും ഉപമുഖ്യമന്ത്രിയുമായ ദിനേശ് ശര്മ്മ പറഞ്ഞു. മുന്പ് ഭീകരര്ക്ക് എതിരായ കേസുകള് പോലും പിന്വലിക്കാന് അവര് തയ്യാറായിട്ടുണ്ട്. കോടതി വരെ ഇടപെട്ട സാഹചര്യമുണ്ട്. ബംഗ്ലാദേശികള്ക്കും റൊഹിന്ഗ്യകള്ക്കും പൗരത്വം നല്കുമെന്ന് പറയുന്നത് നിര്ഭാഗ്യകരമാണ്.
ദേശീയ ജനസംഖ്യ രജിസ്റ്ററുമായി സഹകരിക്കില്ലെന്ന അഖിലേഷ് യാദവിന്റെ പരാമര്ശത്തെയും അദ്ദേഹം വിമര്ശിച്ചു. ജനസംഖ്യ രജിസ്റ്റര് എല്ലാ വികസന പദ്ധതികളുടെയും അടിസ്ഥാനമാണെന്ന് അദ്ദേഹത്തിന് അറിയില്ലായിരിക്കാം. ക്ഷേമപദ്ധതികളില് നിന്ന് ജനങ്ങളെ അദ്ദേഹം അകറ്റിനിര്ത്തുകയാണെന്നും ശര്മ്മ ആരോപിച്ചു.
സമാജ്വാദി പാര്ട്ടി, ബി.എസ്.പി, കോണ്ഗ്രസ് എന്നീ പ്രതിപക്ഷ കക്ഷികള് സാമൂഹ്യ വിരുദ്ധരെ പ്രീതിപ്പെടുത്താന് മത്സരിക്കുകയാണ്. അക്കാര്യത്തില് അവര് തമ്മിലുള്ള 20-20 മത്സരമാണ് നടക്കുന്നതെന്നും ദിനേശ് ശര്മ്മ പറഞ്ഞു.
