ന്യൂഡല്ഹി : പൗരത്വ ഭേദഗതി നിയമത്തിനെതിരെ ഡല്ഹി ജുമഅ മസ്ജിദില് നടത്തിയ പ്രതിഷേധത്തെ തുടര്ന്ന് ജയിലില് കഴിയുന്ന ഭീം ആര്മി നേതാവ് ചന്ദ്രശേഖറിന്റെ ആസാദിന്റെ ആരോഗ്യനില വളരെ മോശമാണെന്നും എത്രയും വേഗം ചികിത്സ ലഭ്യമാക്കണമെന്നും ആവശ്യപ്പെട്ട് അദ്ദേഹത്തെ ചികിത്സിക്കുന്ന ഡോക്ടര്. ട്വിറ്ററിലൂടെയാണ് ഡോ.ഹര്ജിത് സിങ് ഭട്ടി ട്വിറ്ററില് ഇക്കാര്യം വ്യക്തമാക്കിയത്.
ഒരു വര്ഷമായി ആസാദ് തന്റെ ചികിത്സയിലാണെന്നും ആഴ്ചതോറും അദ്ദേഹത്തിന് ഫ്ളെബോടോമി ചികിത്സ ആവശ്യമാണെന്നും ഡോക്ടര് ട്വീറ്റില് വ്യക്തമാക്കുന്നു. ആഴ്ചയില് രണ്ടുതവണ അദ്ദേഹത്തിന്റെ രക്തം മാറേണ്ടതുണ്ട്. കഴിഞ്ഞ ഒരുവര്ഷമായി ഇതിനായി ഡല്ഹി എയിംസില് ചികിത്സ തുടരുകയാണ്. ഈ രക്തമാറ്റം കൃത്യമായി ചെയ്തില്ലെങ്കില് രക്തം കട്ട പിടിക്കാനും ഹൃദയാഘാതം വരെ സംഭവിക്കാനും സാധ്യതയുണ്ട്.
ഇക്കാര്യം പലതവണ ഡല്ഹി പോലീസിനോട് ആവശ്യപ്പെട്ടിരുവെന്നും എന്നാല് അദ്ദേഹത്തെ ആശുപത്രിയില് എത്തിക്കാന് പോലീസ് തയ്യാറാകുന്നില്ലെന്നും ഡോക്ടര് ട്വീറ്റ് ചെയ്തിട്ടുണ്ട്. പ്രതിഷേധത്തിന് പിന്നാലെ അറസ്റ്റിലായ ചന്ദ്രശേഖര് ആസാദിന്റെ ജാമ്യാപേക്ഷ ഡിസംബര് 21 ന് ദല്ഹി കോടതി നിരസിച്ചിരുന്നു. ഇദ്ദേഹത്തെ 14 ദിവസത്തേക്കാണ് ജുഡീഷ്യല് കസ്റ്റഡിയില് വിട്ടത്.
