ന്യൂഡല്ഹി : ഡല്ഹി വിടാന് മണിക്കൂറുകള് ശേഷിക്കേ ജുമുഅ മസ്ജിദിലെത്തി ഭരണഘടനയുടെ ആമുഖം വായിച്ച് ഭീം ആര്മി നേതാവ് ചന്ദ്രശേഖര് ആസാദ്. വ്യാഴാഴ്ച കടുത്ത ഉപാധികളോടെ ജാമ്യം ലഭിച്ച അദ്ദേഹം ഡല്ഹി നഗരം വിടാന് മണിക്കൂറുകള് ശേഷിക്കെയാണ് വീണ്ടും ജുമഅ മസ്ജിദിലെത്തി പ്രതിഷേധക്കാര്ക്കായി ഭരണഘടനയുടെ ആമുഖം വായിച്ചത്.
വ്യത്യസ്ത മതവിഭാഗങ്ങളില്പ്പെടുന്നവര് പ്രതിഷേധത്തിന്റെ ശക്തി തെളിയിക്കാന് അണിനിരന്ന് മുസ്ലിങ്ങള് മാത്രമല്ല പ്രതിഷേധത്തിന് ഉള്ളതെന്ന് തെളിയിക്കണമെന്നും അദ്ദേഹം പറഞ്ഞു. സമാധാനപരമായ പ്രതിഷേധം ജനങ്ങളുടെ അവകാശമാണ്. ഭരണഘടനയുടെ ആമുഖം വായിച്ചുവെറ്റ കുറ്റം ചാര്ത്തിയാണ് തന്നെ അറസ്റ്റ് ചെയ്തത്. ഭരണഘടന പോലും വായിക്കാന് കഴിയാത്ത സാഹചര്യമാണോ രാജ്യത്ത് നിലവിലുള്ളത്. പോരാട്ടം തുടരും. ഏത് തരത്തിലുള്ള നടപടിയുണ്ടായാലും പിന്നോട്ടില്ല. നിയമം പിന്വലിക്കുന്നതുവരെ പോരാട്ടം തുടരാനാണ് തീരുമാനമെന്നും ചന്ദ്രശേഖര് ആസാദ് പറഞ്ഞു.
