കൊച്ചി: കേരളത്തെ ഞെട്ടിച്ച കൊലപാതക പരമ്പര അരങ്ങേറിയ കൂടത്തായി സംഭവവുമായി ബന്ധപ്പെട്ടുള്ള ടെലിവിഷന് പരമ്പര യാഥാര്ത്ഥ്യമല്ലാത്ത കാര്യങ്ങള് അവതരിപ്പിക്കുകയും ജനങ്ങളെ ആശയക്കുഴപ്പത്തിലാക്കുകയും ചെയ്യുന്നതായി കോടതിയില് ഹര്ജി. സാക്ഷികളെ പോലും കുറ്റവാളികളെ പോലെ അവതരിപ്പിക്കുകയും യാഥാര്ത്ഥ്യമല്ലാത്ത കാര്യങ്ങള് മെനയുകയും ചെയ്യുന്ന സീരിയല് കേസിനെ വരെ ബാധിക്കുന്ന നിലയിലാണ് പോകുന്നതെന്ന് ആരോപിച്ച് പൊന്നാമറ്റം വീടിന്റെ അയല്വാസി മുഹമ്മദ് ബാബയാണ് ഹര്ജി സമര്പ്പിച്ചിരിക്കുന്നത്.
കച്ചവട താല്പ്പര്യം വെച്ച് തുടങ്ങിയിരിക്കുന്ന പരമ്പര മുഖ്യപ്രതി ജോളിയുടേയും കൊല്ലപ്പെട്ട റോയ് തോമസിന്റെയും മക്കളുടെ മാനസീക നിലയെ വരെ സമ്മര്ദ്ദത്തില് ആക്കുന്നതും ജീവിതം നശിപ്പിക്കുന്നതും ആണെന്ന് ഹര്ജിയില് പറയുന്നു. യഥാര്ത്ഥമല്ലാത്ത കാര്യങ്ങള് അവതരിപ്പിച്ച സാക്ഷികളെ മോശക്കാരായും കുറ്റവാളികളായും ചിത്രീകരിക്കുന്ന പരമ്പര കോടതിയെ പോലും ആശയക്കുഴപ്പത്തില് ആക്കുമെന്നും പറയുന്നു.
കൊലപാതക പരമ്പരയില് രണ്ടു കേസില് മാത്രമാണ് ഇപ്പോള് കുറ്റപത്രം സമര്പ്പിച്ചിരിക്കുന്നത്. ഒരു കേസില് 250 പേരും രണ്ടാമത്തെ കേസില് 150 പേരും സാക്ഷികളായുള്ള കേസിനെ വരെ തകര്ക്കാന് പരമ്പര കാരണമാകുമെന്നും കുറ്റവാളികള് രക്ഷപ്പെടുന്ന സാഹചര്യം സൃഷ്ടിക്കുമെന്നും പറഞ്ഞിട്ടുണ്ട്.
കേസുകളില് അന്വേഷണം പൂര്ത്തിയാകുകയോ വിചാരണ നടക്കുകയോ ചെയ്യാത്ത കേസിനെ ആസ്പദമാക്കി സിനിമയും സീരിയലും വരുന്നത് പ്രതികൂലമായി ബാധിക്കാന് കാരണമാകുമെന്നും സീരിയല് നിരോധിക്കണമെന്നും ഹര്ജിയില് ആവശ്യപ്പെടുന്നുണ്ട്. സംഭവത്തെ ആസ്പദമാക്കി ഫ്ളവേഴ്സ് ചാനലില് സംപ്രേഷണം ചെയ്തുകൊണ്ടിരിക്കുന്ന പരമ്പര ഗിരീഷ് കോന്നിയാണ് ഒരുക്കുന്നത്.
മുഖ്യ കഥാപാത്രമായി എത്തുന്നത് സിനിമാതാരം മുക്തയാണ്. നേരത്തേ സീരിയല് സംപ്രേഷണം ചെയ്യരുത് എന്നാവശ്യപ്പെട്ട് ജോളിയുടെ മക്കള് നല്കി ഹര്ജി കോടതി അംഗീകരിച്ചിരുന്നില്ല. എതിര്കക്ഷികള്ക്ക് നോട്ടീസ് നല്കാനായിരുന്നു തീരുമാനം. ഇതേ തുടര്ന്ന് ജനുവരി 25 ന് ഈ വിഷയത്തില് സിനിമാ സീരിയലുകള് നിര്മ്മിക്കുന്നവര് കോടതിയില് ഹാജരാകാന് ആവശ്യപ്പെട്ടിരിക്കുകയാണ്.
