ഈണം എന്ന ചിത്രത്തിന് പശ്ചാത്തല സംഗീതം നല്കി കൊണ്ടാണ് പ്രമുഖ സംഗീത സംവിധായകന് ഔസേപ്പച്ചന് മലയാള സിനിമയിലേക്ക് എത്തിയത്. ഔസേപ്പച്ചന്റെ ഗാനങ്ങളില് മിക്കതും ആലപിച്ചിട്ടുള്ളത് ഗാനഗന്ധര്വ്വന് യേശുദാസ് തന്നെയാണ്. എന്നാല് ഔസേപ്പച്ചന്റെ ഒരു ഗാനം പാടാന് യേശുദാസിന് സാധിച്ചില്ല. 15 തവണ ശ്രമിച്ചിട്ടും യേശുദാസിന് പാടാന് കഴിയാഞ്ഞതോടെ ഗതികേട് കൊണ്ട് അവസാനം താന് തന്നെ ആ പാട്ട് പാടേണ്ടി വന്നെന്നാണ് ഔസേപ്പച്ചന് തുറന്ന് പറഞ്ഞത്.
ജോണ്പോളിന്റെ തിരക്കഥയില് ഉണ്ണികളെ ഒരു കഥ പറയാം എന്ന ചിത്രത്തിലെ പുഞ്ചിരിയുടെ പൂവിളികളില് ഉണ്ടൊരു രാഗം എന്ന പാട്ടിന്റെ ആദ്യം വരുന്ന കളകളമൊഴുകും എന്ന ഗാനമായിരുന്നു 15 തവണ ശ്രമിച്ചിട്ടും യേശുദാസിന് പാടാന് കഴിയാതെ പോയത്. ഉണ്ണികളേ ഒരു കഥ പറയാം എന്ന ചിത്രത്തിന് 1987-ലെ മികച്ച സംഗീതസംവിധായകനുള്ള കേരളസംസ്ഥാന ചലചിത്ര പുരസ്കാരം ഔസപ്പച്ചന് ലഭിച്ചിരുന്നു. ഒരു പ്രമുഖ മാധ്യമത്തിന് നല്കിയ അഭിമുഖത്തിലാണ് ഔസേപ്പച്ചന് ഇക്കാര്യം വ്യക്തമാക്കിയത്.
'' ദാസേട്ടന് കുറേ ശ്രമിച്ചതാണ് അത് പാടാന്. ഈ ട്രാക്ക് ഞാന് ആദ്യമേ പാടിവച്ചിട്ടുണ്ടായിരുന്നു. അന്ന് ദാസേട്ടന് വരികള് പറയാന് പറഞ്ഞു. അപ്പൊ പ്രാക്ടീസ് ചെയ്യുമ്പോള് ഈ വരികള് ദാസേട്ടന് പതുക്കെ പാടി പക്ഷേ, റെക്കോഡ് ചെയ്യുമ്പോള് അത്രയും സ്പീഡില് പാടാന് അദ്ദേഹത്തിന് സാധിച്ചില്ല. അപ്പോള് ദാസേട്ടന് പറഞ്ഞു, പാട്ട് ആദ്യം എടുക്കാം. ഈ ഭാഗം പിന്നീട് പ്രാക്ടീസ് ചെയ്തിട്ട് മറ്റൊരു ദിവസം എടുക്കാം.
പക്ഷേ, അന്ന് ഞാന് അറിഞ്ഞത് ദാസേട്ടന് ഇത് ഒരു പത്ത് പതിനഞ്ച് പേപ്പറില് കോപ്പി ചെയ്തിട്ട് ഇത് എല്ലാവര്ക്കും പാടാന് കൊടുത്തു. അന്ന് ഇത് ആര്ക്കും പാടാന് പറ്റിയില്ല. എന്നിട്ട് ദാസേട്ടന് എന്ന വിളിച്ചു പറഞ്ഞു, എനിക്ക് മാത്രമല്ല ഇത് വേറെ ആര്ക്കും പാടാന് പറ്റുന്നില്ല. ഇത് നീയങ്ങട് പാടിയാല് മതിയെന്ന് പറഞ്ഞ് എന്റെ തലയില് ഇട്ടു. അങ്ങനെ അവസാനം ഞാന് തന്നെ പാടി. അന്ന് ഗതികേട് കൊണ്ടാണ് ഞാന് അത് പാടിയത്'' - ഔസേപ്പച്ചന് പറയുന്നു.
