കോഴിക്കോട് : എല്ഡിഎഫിന്റെ പരിപാടിയില് കൈകോര്ക്കാന് എത്തിയതിന് സ്വന്തം പാര്ട്ടിയില് നിന്നും നടപടി നേരിടേണ്ടി വന്ന മുസ്ളീം ലീഗ് നേതാവ് ഐഎന്എല്ലിന്റെ ഉപവാസ സമര വേദിയിലും. എല്ഡിഎഫ് മുമ്പോട്ട് വെച്ച മനുഷ്യ മഹാ ശൃംഖലയില് പങ്കെടുത്തതിന് ലീഗില് നിന്നും പുറത്താക്കിയ കെ എം ബഷീറാണ് വീണ്ടും ഇടതു പാളയത്ത് എത്തി വിവാദം കൊഴുപ്പിച്ചത്.
ബേപ്പൂര് മണ്ഡലം വൈസ് പ്രസിഡന്റ് സ്ഥാനത്ത് ഇരിക്കുമ്പോഴാണ് കെ എം ബഷീര് റിപ്പബ്ളിക് ദിനത്തില് ഇടതുമുന്നണി സംഘടിപ്പിച്ച പരിപാടിയില് പങ്കെടുത്തത്. പിന്നാലെ പാര്ട്ടിയില് നിന്നും സസ്പെന്ഷനും വന്നിരുന്നു. ഇത് വലിയ വിവാദമാണ് യുഡിഎഫില് ഉണ്ടാക്കിയത്. പരിപാടിയില് പങ്കെടുക്കാന് ഇടതുപാളയത്ത് എത്തിയ നേതാക്കളെ കരുതലോടെ കാണണമെന്ന് യുഡിഎഫ് നേതാക്കള് പറയുകയും ചെയ്തിരുന്നു. എന്നാല് പൗരത്വ നിയമ ഭേദഗതിക്ക് എതിരേ നടക്കുന്ന എല്ലാ സമരങ്ങളിലും ആരു നടത്തിയാലും പങ്കാളിയാകും എന്നായിരുന്നു ബഷീറിന്റെ നിലപാട്.
ഇന്ത്യന് പൗരനെന്ന നിലയിലുള്ള കടമയാണ് നിറവേറ്റിയതെന്നും പറഞ്ഞിരുന്നു. പൗരത്വ നിയമവിരുദ്ധ പ്രതിഷേധങ്ങളില് രാഷ്ട്രീയം നോക്കാതെ പങ്കെടുക്കുമെന്ന് വ്യക്തമാക്കിയ അദ്ദേഹം പക്ഷേ ഐഎന്എല്ലില് ചേരാന് ഉദ്ദേശിച്ചിട്ടില്ലെന്നും പറഞ്ഞു. ബഷീര് എല്ഡിഎഫ് പരിപാടിയില് പങ്കെടുത്തത് വിവാദമാക്കേണ്ട എന്ന് കുഞ്ഞാലിക്കുട്ടി എംപി അറിയിച്ചതിന് തൊട്ടു പിന്നാലെയാണ് ബഷീറിനെതിരേ പാര്ട്ടി നിയമ നടപടി സ്വീകരിച്ചത്.
