ന്യുഡല്ഹി: പാര്ലമെന്റിന്റെ ബജറ്റ് സമ്മേളനത്തിനു മുന്നോടിയായുള്ള രാഷ്ട്രപതിയുടെ നയപ്രഖ്യാപന പ്രസംഗം പ്രതീക്ഷിച്ചപോലെ പ്രതിപക്ഷ പ്രതിഷേധത്തിന് ഇടയാക്കി. പൗരത്വ നിയമ ഭേദഗതിയെ കുറിച്ചുള്ള പ്രസംഗത്തിലെ പരാമര്ശമാണ് ഭരണകക്ഷിയുടെ നിലയ്ക്കാത്ത കരഘോഷത്തിനും പ്രതിപക്ഷത്തിന്റെ പ്രതിഷേധത്തിനും ഇടയാക്കിയത്.
'വിഭജനത്തിനു ശേഷം പാകിസ്താനില് പെട്ടുപോയ ഹിന്ദുക്കള്ക്കും സിഖുകാര്ക്കും അവിടെനിന്ന് ഇന്ത്യയിലേക്ക് മടങ്ങാന് കഴിയണമെന്നത് രാഷ്ട്രപിതാവ് മഹാത്മ ഗാന്ധിയുടെ ആഗ്രഹമായിരുന്നു. അവര്ക്ക് സ്വാഭാവിക ജീവിതം നല്കുക എന്നത് ഇന്ത്യ സര്ക്കാരിന്റെ കടമയാണ്. രാഷ്ട്രശില്പികളുടെ ആ സ്വപ്നം സാക്ഷാത്കരിക്കാര് പൗരത്വ നിയമ ഭേദഗതി പാസാക്കാന് പാര്ലമെന്റിന്റെ ഇരുസഭകള്ക്കും കഴിഞ്ഞുവെന്നതില് തനിക്ക് സന്തോഷമുണ്ട്.' എന്നായിരുന്നു രാഷ്ട്രപതി രാംനാഥ് കോവിന്ദിന്റെ പ്രസംഗം. ഇതിടെ പ്രധാനമന്ത്രി നരേന്ദ്രമോഡി, കേന്ദ്രമന്ത്രിമാര് എന്നിവര് അടങ്ങുന്ന ട്രഷറി ബെഞ്ച് കയ്യടിച്ച് സ്വീകരിച്ചു. ഏറെനേരം നീണ്ടുനിന്ന കയ്യടി അവസാനിച്ചതോടെ പ്രതിപക്ഷം പ്രതിഷേധം തുടരുകയായിരുന്നു.
'വര്ഷങ്ങളായി ന്യൂനപക്ഷങ്ങള് പാകിസ്താനില് അടിച്ചമര്ത്തല് നേരിടുകയാണ്. അടുത്തകാലത്ത് നങ്കണ സാഹിബിന്റെ സംഭവം തെളിവാണ്. പാകിസ്താനില് എന്താണ് നടക്കുന്നതെന്ന് ലോകത്തെ അറിയിക്കേണ്ട ചുമതല നമ്മുക്കുണ്ട് പാകിസ്താനില് ന്യുനപക്ഷങ്ങളെ അടിച്ചമര്ത്തുന്നതില് തനിക്ക് ആശങ്കയുണ്ട്. രാജ്യാന്തര സമൂഹം അതിലേക്ക് ശ്രദ്ധതിരിക്കണം. സി.എ.എ നടപ്പാകുന്നതോടെ രാജ്യത്തിന്റെ വടക്കുകിഴക്കന് മേഖലയില് ജീവിക്കുന്നവരുടെ സാംസ്കരവും സംരക്ഷിക്കുമെന്ന് സര്ക്കാര് ഉറപ്പുനല്കുന്നുവെന്നും രാഷ്ട്രപതി വ്യക്തമാക്കി.
അയോധ്യ കേസില് സുപ്രീം കോടതി വിധിയെ സ്വാഗതം ചെയ്ത ജനങ്ങളെയും അദ്ദേഹം കീര്ത്തിച്ചു. രാജ്യത്തിന്റെ ഒരു ഭാഗവും ഉപേക്ഷിക്കപ്പെടാനുള്ളതല്ല. അനുഛേദം 370 ഉം 35എ യും റദ്ദാക്കിയ നടപടിയും ചരിത്രപരമാണ്. അത് ജമ്മു കശ്മീരിലും ലഡാക്കിലും വികസനം കൊണ്ടുവരുമെന്നും അദ്ദേഹം ന്യായീകരിച്ചു. ജമ്മു കശ്മീരില് ബ്ലോക്ക് ഡവലപ്മെന്റ് കൗണ്സില് തെരഞ്ഞെടുപ്പ് സമാധാനപരമായി നടന്നു. ജമ്മു കശ്മീരിന്റെയും ലഡാക്കിന്റെയും വികസനം രാജ്യത്തിന്റെ വികസനത്തിന് നിര്ണായകമാണ്.
കര്താര്പൂര് സാഹിബ് ഇടനാഴി തന്റെ സര്ക്കാര് റെക്കോര്ഡ് സമയത്താണ് പൂര്ത്തിയാക്കിയത്. ജനാധിപത്യം കൂടുതല് ശക്തിപ്പെടുത്തുന്നതില് ചര്ച്ചകളും സംവാദങ്ങളും പങ്കുവയ്ക്കുമെന്ന് തന്റെ സര്ക്കാരിന് വ്യക്തതയുണ്ട്. ആയുഷ്മാന് ഇന്ഷുറന്സ് പദ്ധതിയില് ഉള്പ്പെടുത്തി 50 കോടി ജനങ്ങള്ക്കാണ് സൗജന്യ ചികിത്സ നല്കുന്നത്. 24 കോടി ജനങ്ങള്ക്ക് ഇതിന്റെ പ്രയോജനം ലഭിച്ചുകഴിഞ്ഞു. 2.5 കോടി ജനങ്ങള്ക്ക് സൗജന്യ വൈദ്യുതി കണക്ഷന് ലഭിച്ചു. അങ്ങേയറ്റം സുതാര്യമായും പക്ഷഭേദം ഇല്ലാതെയുമാണ് ഇത് നടപ്പാക്കിയത്.
പ്രതിഷേധത്തിന്റെ പേരില് സമൂഹത്തില് നടക്കുന്ന ഏതൊരു അതിക്രമവും രാജ്യത്തെ ദുര്ബലപ്പെടുത്തുമെന്നും അദ്ദേഹം പറഞ്ഞു. സര്ക്കാരിന്റെ പ്രത്യേക അഭ്യര്ത്ഥന മാനിച്ച് സൗദി അറേബ്യ ഹജ്ജ് ക്വാട്ട ഉയര്ത്തി. ഇത്തവണ രണ്ടു ലക്ഷം ഇന്ത്യന് മുസ്ലീങ്ങള്ക്ക് ഹജ്ജ് കര്മ്മം നിര്വഹിക്കാന് കഴിഞ്ഞു. ഹജ്ജ് യാത്രയുടെ നടപടിക്രമങ്ങള് പൂര്ണ്ണമായൂം ഡിജിറ്റലും ഓണ്ലൈനുമാക്കിയ ആദ്യ രാജ്യം ഇന്ത്യയാണെന്നും രാഷ്ട്രപതി ചൂണ്ടിക്കാട്ടി.
