കൊല്ലം: കേരളത്തില് രണ്ടാമത്തെ കൊറോണ കേസ് നിഗമനം മാത്രമെന്ന് ആരോഗ്യമന്ത്രി കെ കെ ശൈലജ. ആലപ്പുഴ മെഡിക്കല് കോളേജില് ചികിത്സയില് കഴിയുന്ന ഒരു കുട്ടിക്ക് കൂടി കൊറോണ പോസിറ്റീവ് ആകാന് സാധ്യതയുണ്ടെന്ന് മന്ത്രി പറഞ്ഞു. അന്തിമ പരിശോധനാഫലം ലഭിച്ചിട്ടില്ല. ഇത് ലഭിച്ചാല് മാത്രമേ രോഗം സ്ഥിരീകരിക്കൂ. നിരീക്ഷണത്തിലുള്ള കുട്ടിയുടെ ആരോഗ്യ നില തൃപ്തികരമാണെന്നും മന്ത്രി പറഞ്ഞു.
'ഇന്ന് ഒരു കേസ് കൂടി പോസിറ്റീവ് ആണെന്നത് പ്രാഥമിക പരിശോധനയിലെ നിഗമനമാണ്. പുണെ വൈറോളജി ഇന്സ്റ്റിറ്റിയൂട്ടില് നിന്ന് പരിശോധനാ ഫലം ലഭിച്ചിട്ടില്ല. പരിശോധനാ ഫലം ലഭിച്ചാല് മാത്രമേ രോഗം സ്ഥിരീകരിക്കാന് ആകൂ. ഫോണ് വഴി ബന്ധപ്പെട്ടപ്പോള് കിട്ടിയ വിവരം മാത്രമാണ് ഉള്ളത്. സംശയിക്കുന്നത്, ആലപ്പുഴ മെഡിക്കല് കോളേജിലുള്ള കുട്ടിക്കാണ് കോറോണവൈറസ് ബാധയുള്ളത് എന്നാണ്. ഇത് നിഗമനം മാത്രമാണ്. റിപ്പോര്ട്ട് വരാതെ സ്ഥിരീകരിക്കാന് സാധിക്കില്ല. വുഹാന് സര്വകലാശാലയില് നിന്ന് വന്നതാണ് ഈ കുട്ടിയു'മെന്നും ആരോഗ്യമന്ത്രി പറഞ്ഞു.
രോഗമുള്ളവരോ രോഗ സാധ്യതയുള്ളവരോ ആരോഗ്യ വകുപ്പിന്റെ മുന്കരുതല് നടപടിയുമായി പൂര്ണ്ണമായി സഹകരിക്കണം. ആരും അതില് വീഴ്ച വരുത്തരുത്. രോഗവ്യാപനം തടയാനും ആപത്തിലേക്ക് പോകാതിരിക്കാനുമാണ് ആരോഗ്യ വകുപ്പ് ജാഗ്രതാ നിര്ദ്ദേശം നല്കുന്നത്. അത് എല്ലാവരും മനസിലാക്കി പ്രവര്ത്തിക്കണമെന്നും ആരോഗ്യമന്ത്രി കെ കെ ശൈലജ പറഞ്ഞു.
അതേസമയം ചൈനയില് നിന്നും മടങ്ങി എത്തിയയാളിലാണ് വൈറസ് ബാധ സ്ഥിരീകരിച്ചു എന്ന് കേന്ദ്ര ആരോഗ്യമന്ത്രാലയം വ്യക്തമാക്കി. വൈറസ് ബാധിച്ചയാള് ആശുപത്രിയില് ഐസൊലേഷന് വാര്ഡില് ചികിത്സയില് ആണെന്നും ആശങ്കപ്പെടേണ്ട അവസ്ഥ ഇല്ലെന്നും കേന്ദ്ര ആരോഗ്യമന്ത്രാലയം പുറത്തിറക്കിയ പത്ര കുറിപ്പില് പറയുന്നു.
