ന്യൂഡല്ഹി: ഡല്ഹി തിരഞ്ഞെടുപ്പ് പ്രചരണത്തില് നിന്ന് ബിജെപി എംപി പര്വേഷ് വെര്മ്മയ്ക്ക് വീണ്ടും വിലക്ക്. ഡല്ഹി മുഖ്യമന്ത്രി അരവിന്ദ് കെജ്രിവാള് തീവ്രവാദിയാണെന്ന പരാമര്ശം നടത്തിയതിനെ തുടര്ന്നാണ് അടുത്ത 24 മണിക്കൂറത്തേയ്ക്ക് ബിജെപി എംപിക്ക് വീണ്ടും തിരഞ്ഞെടുപ്പ് കമ്മീഷന് വിലക്കിയിരിക്കുന്നത്. വിദ്വേഷ പ്രസംഗം നടത്തിയതിന്റെ പേരില് തിരഞ്ഞെടുപ്പ് പ്രചരണത്തില് നിന്ന് പര്വേഷ് വെര്മ്മയെ കഴിഞ്ഞ ആഴ്ച 96 മണിക്കൂര് വിലക്കിയിരുന്നു.
ഡല്ഹി മുഖ്യമന്ത്രിയ്ക്കെതിരായ പരാമര്ശത്തിലുടെ പര്വേഷ് വര്മ്മ മാതൃകാ പെരുമാറ്റച്ചട്ടം ലംഘിച്ചതായി ഇന്ന് പുറത്തിറക്കിയ പ്രസ്താവനയില് തിരഞ്ഞെടുപ്പ് കമ്മീഷന് വ്യക്തമാക്കി. പരാമര്ശത്തില് ബിജെപി എംപിയോട് തിരഞ്ഞെടുപ്പ് കമ്മീഷന് വിശദീകരണം തേടിയിരുന്നു.
അരവിന്ദ് കെജ്രിവാളിനെ ഇന്ത്യക്കെതിരെ പോരാടുന്ന ദേശ വിരുദ്ധ ശക്തികളുമായി താരതമ്യപ്പെടുത്തിയ പര്വേഷ് വര്മ്മ മുഖ്യമന്ത്രിയുടെ പ്രതിഛായയ്ക്ക് കളങ്കം വരുത്തിയെന്നും എഎപി ഇലക്ടറല് ഓഫീസര്ക്ക് നല്കിയ പരാതിയില് പറഞ്ഞിരുന്നു.
ഡല്ഹി ഷഹീന്ബാഗിലെ സമരക്കാര്ക്കെതിരെ അധിക്ഷേപകരമായ പ്രസ്താവനയുമായാണ് നേരത്തെ പര്വേഷ് വര്മ്മ രംഗത്തെത്തിയത്. ഷഹീന്ബാഗിലിരിക്കുന്നവര് ഡല്ഹിക്കാരുടെ വീടുകളില് കയറി സഹോദരിമാരെയും മക്കളെയും പീഡിപ്പിച്ച് കൊല്ലുമെന്നായിരുന്നു പര്വേഷിന്റെ വിവാദ പരാമര്ശം നടത്തിയത്. പിന്നാലെ തിരഞ്ഞെടുപ്പ് കമ്മീഷന് വിശദീകരണം തേടുകയും പ്രചരണത്തില് നിന്ന് വിലക്കുകയാുമായിരുന്നു. പിന്നാലെയാണ് കെജ്രിവാളിനെ അധിക്ഷേപിച്ചതിന് വീണ്ടും വിലക്ക് വീണിരിക്കുന്നത്.
