ന്യൂഡല്ഹി: ആംആദ്മിപാര്ട്ടി, ബിജെപി ഇഞ്ചോടിഞ്ച് പോരാട്ടം നടത്തുന്ന ഡല്ഹി നിയമസഭാ തെരഞ്ഞെടുപ്പില് വോട്ടര്മാരെ സ്വാധീനിക്കാന് കേന്ദ്രമന്ത്രി ഗിരിരാജ് സിംഗ് പണവും മദ്യവും വിതരണം ചെയ്തതായി ആംആദ്മി പാര്ട്ടി ആരോപണം. ഇന്നലെ രാത്രി ഡല്ഹിയിലെ ഒരു ആഭരണക്കടയില് ഗിരിരാജ് സിംഗ് പണ വിതരണം നടത്തിയെന്ന് ആരോപിച്ച് ആം ആദ്മി പാര്ട്ടി പ്രവര്ത്തകര് തടിച്ചു കൂടി. ഗിരിരാജ് ജൂവലറിയ്ക്കുള്ളില് നില്ക്കുന്നതിന്റെ വീഡിയോ ദൃശ്യങ്ങളും ആപ്പ് പുറത്തു വിട്ടിട്ടണ്ട്.
ഡല്ഹിയിലെ റിതാല വിധാന് സഭ ഏരിയയില് ഗിരിരാജ്സിംഗ് പണം വിതരണം ചെയ്യുന്നതായി തങ്ങള്ക്ക് വിവരം കിട്ടിയതായി എഎപി നേതാവ് സഞ്ജയ് സിംഗ് പറഞ്ഞു. ഈ ഭാഗത്തുള്ള ആള്ക്കാര് തന്നെയാണ് വിവരം നല്കിയതെന്നും ഇദ്ദേഹം മാധ്യമങ്ങളോട് പറഞ്ഞു. വിവരം തെരഞ്ഞെടുപ്പ് കമ്മീഷനെ ആംആദ്മി പാര്ട്ടി ധരിപ്പിക്കുകയും കര്ശനമായ നടപടിയെടുക്കാനും ആവശ്യപ്പെട്ടിട്ടുണ്ട്. ഡല്ഹില് താമസമല്ലാത്ത പാര്ലമെന്റംഗങ്ങളെ ഉടനടി ഇവിടെ നിന്നും മാറ്റണമെന്നും അവര് വോട്ടര്മാരെ സ്വാധീനിക്കുമെന്നും എഎപി കമ്മീഷനെ അറിയിച്ചിട്ടുണ്ട്.
അതേസമയം താന് മോതിരം വാങ്ങാന് വന്നതാണെന്നാണ് ഗിരിരാജ് സിംഗ് പറഞ്ഞിരിക്കുന്നത്. 41,000 രൂപയ്ക്ക് സ്വര്ണ്ണമോതിരം വാങ്ങിയതിന്റെ രസീതും ഗിരിരാജ് സിംഗ് കാണിച്ചിട്ടുണ്ട്. തെരഞ്ഞെടുപ്പ് മുന്നില് കണ്ട് ബിജെപി പ്രവര്ത്തകര് വോട്ടര്മാര്ക്ക് പണം നല്കി സ്വാധീനിക്കാന് ശ്രമിക്കുമെന്ന് മുന്നറിയിപ്പിനെ തുടര്ന്ന് ആം ആദ്മി പാര്ട്ടി പ്രവര്ത്തകര് ഡല്ഹിയില് ഇന്നലെ രാത്രിയില് ബൂത്ത് തലത്തില് നിരീക്ഷണം ശക്തമാക്കിയിരുന്നു.
കഴിഞ്ഞ ദിവസം ആം ആദ്മി പാര്ട്ടിക്ക് തിരിച്ചടിയായി അഴിമതിക്കേസില് ഉപമുഖ്യമന്ത്രി മനീഷ് സിസോദിയയുടെ ഒ.എസ്.ഡി, (ഓഫീസര് ഓണ് സ്പെഷല് ഡ്യൂട്ടി) ഗോപാല് കൃഷ്ണ മാധവിനെ സി.ബി.ഐ. അറസ്റ്റ് ചെയ്തിരുന്നു. ജി.എസ്.ടിയുമായി ബന്ധപ്പെട്ട വിഷയത്തില് രണ്ടു ലക്ഷം രൂപ െകെക്കൂലി വാങ്ങിയെന്ന കേസിലാണ് അറസ്റ്റ്. 2015 മുതല് സിസോദിയയുടെ ഓഫീസില് പ്രവര്ത്തിക്കുന്നയാളാണ് ഗോപാല്കൃഷ്ണ മാധവ്.
ഇതിനു പുറമേ പെരുമാറ്റച്ചട്ടം ലംഘിെച്ചന്ന പരാതിയില് മുഖ്യമന്ത്രി അരവിന്ദ് കെജ്രിവാളിന് ഇന്നലെ തെരഞ്ഞെടുപ്പ് കമ്മിഷന് നോട്ടീസയച്ചു. ഇന്നു െവെകിട്ട് അഞ്ചിനു മുമ്പായി മറുപടി നല്കണം. ട്വിറ്ററില് പോസ്റ്റ് ചെയ്ത വീഡിയോയാണ് പരാതിക്ക് ആധാരം. മനീഷ് സിസോദിയയ്ക്കുവേണ്ടി െകെക്കൂലി വാങ്ങുമ്പോഴാണ് ഉദ്യോഗസ്ഥന് പിടിയിലായതെന്നാണ് ബി.ജെ.പി വക്താവ് സമ്പിത് പാത്ര ആരോപിച്ചത്. ഗോപാല്കൃഷ്ണ മാധവിന്റെ അറസ്റ്റ് ബി.ജെ.പി. ആഘോഷമാക്കുമ്പോഴാണ് ഗിരിരാജ് സിംഗിനെതിരേ ആം ആദ്മി പാര്ട്ടി പ്രവര്ത്തകരും വീഡിയോ പുറത്ത് വിട്ടത്.
അതിനിടയില് ജനുവരി 6 മുതല് തലസ്ഥാനത്ത് നിന്നും എന്ഫോഴ്സ്മെന്റ് ഏജന്സികള് പണവും മദ്യവും ലഹരിവസ്തുക്കളും മയക്കുമരുന്നും ആഭരണങ്ങളും സൗജന്യമായി വിതരണം ചെയ്യാനിരുന്ന സമ്മാനങ്ങളുമെല്ലാമായി 55.33 കോടിയുടെ മുതലുകള് പിടിച്ചെടുത്തിരുന്നു. 10.39 കോടിയുടെ പണം, 2,72,98,471 രൂപയുടെ മൂല്യം വരുന്ന 99210 ലിറ്റര് മദ്യം, 774.09 കിലോയോളം വരുന്ന 7,87,37,750 രൂപയുടെ മയക്കുമരുന്നും ലഹരി വസ്തുക്കളും ഇതില് ഉള്പ്പെടുന്നു.
