ദുബായ്: പര്ദീ സ്കൂള് ഓഫ് ഗ്ലോബല് സ്റ്റഡിസില് ഗ്രാജുവേഷന്റെ പടിവാതില്ക്കല് എത്തിനില്ക്കെയാണ് ശരദ് കുമാര് നമ്പ്യാറിന്റെ ജീവന് കാര് അപകടത്തില് നിലച്ചത്. ദുബായ്ക്കടുത്ത് കഴിഞ്ഞ ഡിസംബര് 25 നു പുലര്ച്ചെയായിരുന്നു ആ അപകടം. മെഴ്സിഡസ് സെഡാന് മരത്തിലേക്ക് ഇടിച്ചു കയറിയുണ്ടായ അപകടത്തിലാണ് ശരദ് കുമാര് നമ്പ്യാറിന്റെ ജീവന് നിലച്ചത്. കൂടെ ഉണ്ടായിരുന്ന ഉറ്റ സുഹൃത്ത് രോഹിത് കൃഷ്ണ കുമാറും അപകടത്തില് മരിച്ചു.
ശരദ് കുമാര് നമ്പ്യാര് എന്ന പര്ദീ സ്കൂളിലെ സീനിയര് വിദ്യാര്ത്ഥിയെക്കുറിച്ച് എല്ലാവര്ക്കും പറയാനുള്ളതും നല്ലത് മാത്രമാണ്. ക്യാമ്പസ് ഗാതറിങ് ഡേ യിലാണ് ശരദ് കുമാറിനെക്കുറിച്ച് സുഹൃത്തുക്കളും അധ്യാപകരും ഉള്പ്പെടെ നല്ല വാക്കുകള് പങ്കുവെച്ച് അനുസ്മരിച്ചത്.
അവന് കഠിനാദ്ധ്വാനിയായിരുന്നു, മിഡില് ഈസ്റ്റില് ഉണ്ടാകുന്ന ഓരോ വാര്ത്തയും വികസനങ്ങളും അവന് മനസിലാക്കിക്കൊണ്ടിരുന്നു. എപ്പോഴും എല്ലാവരിലും ഒരു കരുതലുണ്ടാകും അവന്.. പര്ദീ സ്കൂള് ഓഫ് ഗ്ലോബല് സ്റ്റഡീസിലെ ഇന്റര്നാഷണല് റിലേഷന്സ് അസിസ്റ്റന്റ് പ്രൊഫസര് ഓര്മ്മിക്കുന്നു. ഒരിക്കല് റെഡ് ക്രോസ് ക്ലിനിക്കില് രക്തദാനത്തിനായി പോയതിനാല് തന്റെ ക്ലാസ് നഷ്ടമായതിനാല് തന്നോട് വന്ന മാപ്പ് പറഞ്ഞതും അദേഹം അനുസ്മരിച്ചു.
ശരദ് കുമാറിന്റെ വിയോഗത്തില് ആ കുടുംബത്തോടും അവന്റെ സുഹൃത്തുക്കള്ക്കും ഉണ്ടായ നഷ്ടം നികത്താനാകാത്തതാണെന്നും അവരുടെ ദു:ഖത്തില് പങ്കുചേര്ന്നുമാണ് ഓരോരുത്തരും അനുസ്മരിച്ചത്. മെയ് മാസത്തിലായിരുന്നു ഗ്രാജുവേഷന് ഡേ. അതിന് അഞ്ചു മാസങ്ങള്ക്കു മുമ്പാണ് അകാലത്തില് മരണം ശരദ് കുമാറിനെ തേടിയെത്തിയത്.
ഡിസംബര് 25 ന് പുലര്ച്ചെ മൂന്നു മണിയോടെയാണ് അപകടം ഉണ്ടായത്. സുഹൃത്തുക്കളുമായുള്ള ഒത്തുചേരല് കഴിഞ്ഞ് ഉറ്റ സുഹൃത്തുമൊത്ത് മടങ്ങും വഴിയായിരുന്നു അപകടം.
