നടി ശ്രീലത നമ്പൂതിരിക്ക് ജന്മദിനാശംസകള് നേര്ന്ന് സംവിധായകന് കെ.മധു. എഴുപത് വയസു തികയുന്ന ശ്രീലത മധുവിന്റെ പതാക എന്ന ചിത്രത്തില് അഭിനയിച്ചിട്ടുണ്ട്. ആ ഓര്മ്മകള് കൂടി അദ്ദേഹം തന്റെ കുറിപ്പില് ചേര്ത്തിട്ടുണ്ട്.
മധുവിന്റെ ഫേസ്ബുക്ക് പോസ്റ്റിന്റെ പൂര്ണരൂപം
ശ്രീലത ചേച്ചിക്ക് എഴുപത് വയസ്സ് തികയുമ്പോള് സ്നേഹത്തിന്റെ പതാകയാണ് മനസ്സില് വീശുന്നത്. ഒരു നിയോഗമായാണ് ശ്രീലത ചേച്ചി ഞാന് സംവിധാനം ചെയ്ത റോബിന് തിരുമല എഴുതി സുരേഷ് ഗോപി നായകനായി എത്തിയ 'പതാക ' എന്ന ചിത്രത്തില് അഭിനയിച്ചതിനെക്കുറിച്ച് പറയാറ്. എന്റെ ഗുരു കൃഷ്ണന് നായര് സാറാണ് 'പഠിച്ച കള്ളന് ' എന്ന സിനിമയില് ശീലത ചേച്ചിയെ വീണ്ടും അടൂര് ഭാസിക്കൊപ്പം അഭിനയിപ്പിച്ചത്.അന്ന് അടൂര് ഭാസിക്കൊപ്പം അഭിനയിക്കാന് മനസ്സില്ലാത്തതിനാല് ഡാന്സ് വശമില്ലെന്ന് പറഞ്ഞ് ഒഴിയാന് ശ്രമം നടത്തിയ ചേച്ചിയെ നിര്ബന്ധിച്ച് എന്റെ ഗുരു അഭിനയിപ്പിച്ചത് ഗുരുവില് നിന്നും ചേച്ചിയില് നിന്നും പല ആവര്ത്തി ഞാന് കേട്ടറിഞ്ഞിട്ടുണ്ട്.
കാലം ഏറെകടന്നപ്പോള് ആറ്റുകാല് ദേവീക്ഷേത്ര ദര്ശന ത്തിനിടെ അവിചാരിതമായാണ് ഞാന് ചേച്ചിയെ കണ്ടത്. എന്റെ മൂത്ത സഹോദരി വത്സല ചേച്ചിയുടെ സഹപാഠിയായിരുന്ന( ഹരിപ്പാട് ഗേള്സ് ഹൈസ്കൂള്)ശ്രീലത ചേച്ചിയോട് എനിക്ക് സഹോദര സ്നേഹത്തിന്റെ സ്വാതന്ത്രമുണ്ടായിരുന്നു ; ചുമ്മാ വീട്ടിലിരിക്കുന്നതെങ്ങനെ, അഭിനയിച്ചു കൂടെ ' എന്ന് അതുകൊണ്ടാണ് ഞാന് ചോദിച്ചതും.' മധുവിന്റെ പടമെങ്കില് വരാം ' എന്ന മറുപടിയും ഒട്ടും ആലോചിക്കാതെയാണ് ചേച്ചിയില് നിന്നും വന്നത്. അങ്ങനെ 'പതാകയില് ചേച്ചി അഭിനയിച്ചപ്പോള് അത് ശ്രീലത നമ്പൂതിരി എന്ന അഭിനേത്രിയുടെ രണ്ടാം വരവായി.ഗുരുവും ശിഷ്യനും ഒരു അഭിനേത്രിയുടെ ജീവിത ചക്രത്തില് ചലനങ്ങള് സൃഷ്ടിക്കാനായത് നിയോഗമല്ലാതെ മറ്റെന്ത് ...?സര്വ്വശക്തനായ ദൈവം ശ്രീലത ചേച്ചിക്ക് 70 തികയുമ്പോഴും അനുഗ്രഹങ്ങള് ചൊരിയുമാറാകടെ...
