വില്ലുപുരം: റോഡരികില് മലമൂത്ത വിസര്ജ്ജനം നടത്തിയതിന്റെ പേരില് ദളിത് യുവാവിനെ തല്ലിക്കൊന്നു. വില്ലുപുരത്ത് ബുധനാഴ്ചയുണ്ടായ സംഭവത്തില് ശക്തിവേല് എന്ന 24 കാരനെയാണ് ആള്ക്കൂട്ടം കൊലപ്പെടുത്തിയത്. സംഭവം ജാതിവൈരമാണെന്നാണ് ആരോപണം ഉയര്ന്നിട്ടുണ്ട്. ശക്തിവേല് ദളിത് വിഭാഗത്തില് പെടുന്ന ആദി ദ്രാവിഡ ജാതിയില് പെട്ടയാളാണെന്നും ഇയാളെ മര്ദ്ദിച്ചത് വണ്ണിയാര് സമുദായത്തില് പെട്ട ആളുകളാണെന്നും റിപ്പോര്ട്ടുകള് പറയുന്നു.
അക്രമത്തിന്റെ സാമൂഹ്യ മാധ്യമങ്ങളില് പോസ്റ്റ് ചെയ്തിരുന്ന ദൃശ്യങ്ങളുടെ അടിസ്ഥാനത്തില് ഏഴു പേരെ പോലീസ് അറസ്റ്റ് ചെയ്തിട്ടുണ്ട്. വണ്ണിയാര് സമുദായത്തില് പെട്ടവര് ധാരാളമായുള്ള സ്ഥലത്ത് വെച്ചാണ് ശക്തിവേല് ആക്രമിക്കപ്പെട്ടത്. ചൊവ്വാഴ്ച നൈറ്റ് ഡ്യൂട്ടി ചെയ്ത ശേഷം രാവിലെ വീട്ടിലെത്തിയ ശക്തിവേലിന് രാവിലെ കൂടെ ജോലി ചെയ്തിരുന്ന ചിലരുടെ ഫോണ് വന്നിരുന്നു. വെരിഫിക്കേഷന് ഉണ്ടെന്നും ആധാര് കാര്ഡും ഫോട്ടോയുമായി വരാനായിരുന്നു നിര്ദേശം. തുടര്ന്ന് 27 കി.മീ. ദൂരെയുള്ള പമ്പിലേക്ക് ഇയാള് ടൂ വീലറില് പോയി.
ഇടയ്ക്ക് വെച്ച് ശക്തിവേല് തന്നെ വിളിച്ച് വാഹനത്തില് പെട്രോള് തീര്ന്നു പോയതായി വിളിച്ചു പറഞ്ഞു. വയറിന് സുഖമില്ലെന്നും റോഡരികില് ഇരിക്കുകയാണ് എന്നും സഹോദരി പറഞ്ഞു. പിന്നീട് ഈ ഫോണില് നിന്നും വന്ന രണ്ടാമത്തെ കോളില് മറ്റൊരു ശബ്ദവുമുണ്ടായിരുന്നു. ബുത്തൂര് ഹില്സിലേക്ക് വരാനും പറഞ്ഞു. ഒരു ബന്ധുവിനെയും കൂട്ടി സഹോദരി അവിടെയെത്തുമ്പോള് ശക്തിവേലിന്റെ മൂക്കില് നിന്നും വായില് നിന്നും ചോര വരുന്നുണ്ടായരുന്നു. 15 - 20 പേര് ചുറ്റും കൂടി നില്ക്കുന്നുമുണ്ടായിരുന്നു. അപ്പോള് മര്ദ്ദിച്ചപ്പോള് സഹോദരി ഇടയ്ക്ക് കയറി. അവരെയും അവിടെയുണ്ടായിരുന്നവര് മര്ദ്ദിച്ചു.
സംസാരിക്കാന് പോലും കഴിയാതിരുന്ന ശക്തിവേല് സഹോദരിയോട് പോകാന് ആംഗ്യം കാട്ടി. പിന്നീട് പോലീസ് എത്തി ശക്തിവേലിനെ ബൈക്കിലിരുത്തി സഹോദരിയും ബന്ധുവും പോയി. എന്നാല് വീട്ടിലെത്തി ബൈക്ക് നിര്ത്തിയപ്പോള് തന്നെ ശക്തിവേല് നിലത്തേക്ക് വീണു. ബോധമില്ലായിരുന്നു. ആശുപത്രിയില് എത്തിച്ചപ്പോള് മരിച്ചതായി മനസ്സിലാക്കുകയായിരുന്നു. സംഭവത്തില് നാലു പുരുഷന്മാരേയും മൂന്ന് സ്ത്രീകളെയുമാണ് അറസ്റ്റ് ചെയ്തിരിക്കുന്നത്്് .
