ന്യുഡല്‍ഹി: ഷഹീന്‍ബാഗ് സമരത്തില്‍ സുപ്രീം കോടതി ഇടപെടല്‍. ജനാധിപത്യത്തില്‍ സമരം ചെയ്യാന്‍ ജനങ്ങള്‍ക്ക് മൗലികാവകാശമുണ്ട്. എന്നാല്‍ അതിന്റെ പേരില്‍ റോഡുകള്‍ ഉപരോധിക്കാന്‍ കഴിയില്ല. എല്ലാത്തിനും ഒരു സംതുലിതാവസ്ഥ വേണം. ഇവിടെ എല്ലാം അവതാളത്തിലാണെന്നും ജസ്റ്റീസ് സഞ്ജയ് കിഷന്‍, ജസ്റ്റീസ് കെ.എം ജോസഫ് എന്നിവരുടെ ബെഞ്ച് നിരീക്ഷിച്ചു.
എവിടെ പ്രതിഷേധം നടത്തണമെന്നാണ് ചോദ്യം. തെരുവുകള്‍ പോലെയുള്ള സ്ഥലങ്ങളില്‍ അത് പാടില്ലെന്നും കോടതി ചൂണ്ടിക്കാട്ടി. കാഴ്ചപ്പാടുകള്‍ പ്രകടിപ്പിക്കുമ്പോള്‍ളാണ് ജനാധിപത്യം പുലരുന്നത്. എന്നാല്‍ അതിന് അതിരുകളും അതിര്‍ത്തികളുമുണ്ട്. അവര്‍ക്ക് പ്രതിഷേധിക്കാം. പൗരത്വ നിയമ ഭേദഗതിക്കെതിരായ സുപ്രീം കോടതി വിധിക്കായി കാത്തിരിക്കേണ്ടതില്ല. എന്നാല്‍ ഇവിടെത്തെ പ്രശ്‌നം, റോഡുകള്‍ പ്രതിഷേധത്തിന് തെരഞ്ഞെടുക്കുന്നതാണെന്നും ജസ്റ്റീസ് സഞ്ജയ് കൗള്‍ ചൂണ്ടിക്കാട്ടി.
സമരക്കാരുമായി മധ്യസ്ഥ ചര്‍ച്ച നടത്തണമെന്നും അതിനായി മുതിര്‍ന്ന അഭിഭാഷകരായ സജ്ഞയ് ഹെഗ്‌ഡെ, സാധന രാമചന്ദ്രന്‍ എന്നിവരോട് സമരക്കാരെ കാണാനും കോടതി നിര്‍ദേശിച്ചു. സമരക്കാര്‍ക്ക് പകരം സ്ഥലം കണ്ടെത്തി നല്‍കാന്‍ ഡല്‍ഹി പോലീസിനും കോടതി നിര്‍ദേശം നല്‍കി. രാംലീല മൈതാന്‍, ലാല്‍കില എന്നിവിടങ്ങളില്‍ സമരം തുടരാം. ചര്‍ച്ചയുടെ വിശദാംശം 24ന് അറിയിക്കാനും കോടതി നിര്‍ദേശിച്ചു.
ഷഹീന്‍ബാഗിനെ സമരക്കാര്‍ അനിശ്ചിതമായി നീളുന്നതില്‍ ബുദ്ധിമുട്ട് ചൂണ്ടിക്കാട്ടി സമര്‍പ്പിച്ച ഹര്‍ജിയിലാണ് കോടതിയുടെ ഇടപെടല്‍. പൗരത്വ നിയമ ഭേദഗതിക്കെതിരെ രണ്ടു മാസത്തിലേറെയായി ഷഹീന്‍ബാഗില്‍ പ്രതിഷേധം തുടരുകയാണ്. ഈ മാസം ആദ്യആഴ്ച ഹര്‍ജികള്‍ കോടതിയില്‍ എത്തിയെങ്കിലും ഡല്‍ഹി തെരഞ്ഞെടുപ്പിന്റെ പശ്ചാത്തലത്തില്‍ മാറ്റിവയ്ക്കുകയായിരുന്നു.
നാലു മാസം പ്രായമുള്ള കുഞ്ഞ് സമരത്തിനിടെ മരണമടഞ്ഞത് ചോദ്യം ചെയ്തും കോടതിയില്‍ ഹര്‍ജി എത്തിയിരുന്നു.
Comments