ന്യൂഡല്ഹി: ജമ്മു കശ്മീരിന്റെ പ്രത്യേക പദവി എടുത്തുകളഞ്ഞതില് കേന്ദ്രസര്ക്കാരിനെ വിമര്ശിച്ച ബ്രിട്ടീഷ് എം.പി ഡെബി അബ്രഹാംസിനെ ഡല്ഹി എയര്പോര്ട്ടില് തടഞ്ഞു. തുടര്ന്ന് ഇവരെ ദുബായിലേക്ക് കയറ്റിവിട്ടു. ഡല്ഹിയില് വിമാനമിറങ്ങിയപ്പോഴാണ് ഡെബിക്ക് ഇ വിസ നിഷേധിച്ച കാര്യം അറിയുന്നത്. ഒരു കുറ്റവാളിയെപ്പോലെയാണ് തന്നോട് പെരുമാറിയതെന്ന് ഡെബി പ്രതികരിച്ചു.
ഇന്ത്യ സന്ദര്ശിക്കുന്നതിന് സാധുവായ വിസ ഡെബി അബ്രഹാംസിന് ഇല്ലായിരുന്നുവെന്നും അവരെ വിവരങ്ങള് ബോധ്യപ്പെടുത്തിയിട്ടുണ്ടെന്നുമാണ് കേന്ദ്ര ആഭ്യന്തര മന്ത്രാലയം നല്കുന്ന വിശദീകരണം.
അതേസമയം എന്തുകൊണ്ടാണ് ഡെബി അബ്രഹാംസിന് സന്ദര്ശനാനുമതി നിഷേധിച്ചതെന്ന് അറിയാന് ഇന്ത്യന് അധികൃതരുമായി ബന്ധപ്പെട്ടുവരികയാണെന്ന് ബ്രിട്ടീഷ് ഹൈകമ്മീഷന് വ്യക്താവ് അറിയിച്ചു. ഡല്ഹി വിമാനത്താവളത്തില് എം.പിക്ക് നയതന്ത്ര സഹായം നല്കിയതായും ബ്രിട്ടീഷ് ഹൈക്കമ്മീഷന് വ്യക്തമാക്കി.
ഡല്ഹി വിമാനത്താവളത്തില് എത്തിയപ്പോള് എല്ലാ യാത്രാ രേഖകളും ഹാജരാക്കിയിരുന്നതായി ഡെബി അബ്രഹാംസ് പറഞ്ഞു. തന്റെ ഫോട്ടോ വിമാനത്താവളത്തിലെ ഉദ്യോഗസ്ഥന് നല്കി. അപ്പോള് അയാള് മുന്നിലുണ്ടായിരുന്ന കമ്പ്യൂട്ടര് സ്ക്രീനില് നോക്കിയ ശേഷം വിസ റദ്ദാക്കിയതായി അറിയിക്കുകയായിരുന്നു. പിന്നീട് വളരെ മോശമായ രീതിയില് തന്നോട് പെരുമാറിയെന്നും ഡെബി പറഞ്ഞു.
