കൊല്ക്കത്ത: പശ്ചിമ ബംഗാളില് അടുത്ത സര്ക്കാര് ബിജെപിയുടേത് ആയിരിക്കുമെന്നും മമതാബാനര്ജിയെ 2021 ല് നടക്കാനിരിക്കുന്ന തെരഞ്ഞെടുപ്പില് പിഴുതെറിയുമെന്നും കേന്ദ്ര ആഭ്യന്തരമന്ത്രി അമിത്ഷാ. തൃണമൂല് കോണ്ഗ്രസിന്റെ കുടുംബവാഴ്ച തകര്ത്ത് പശ്ചിമബംഗാളില് ബിജെപി മൂന്നില് രണ്ട് ഭൂരിപക്ഷം നേടുമെന്നും പ്രതിപക്ഷം അക്രമം നടത്തുകയാണെന്നും അതുകൊണ്ട് പൗരത്വ ഭേദഗതി നിയമത്തില് നിന്നും കേന്ദ്രത്തെ പിന്തിരിപ്പിക്കാമെന്ന് കരുതേണ്ടെന്നും പറഞ്ഞു.
ഏപ്രിലില് പ്രാദേശിക സര്ക്കാരുകളുടെ തെരഞ്ഞെടുപ്പ് ബംഗാളില് നടക്കാനിരിക്കെ ഞായറാഴ്ച നടന്ന ബിജെപിയുടെ തെരഞ്ഞെടുപ്പ് പ്രചരണ പരിപാടിയില് സംസാരിക്കുകയായിരുന്നു അമിത്ഷാ. ആദ്യത്തെ അഞ്ചു വര്ഷം നരേന്ദ്രമോഡിയുടെ വികസന പദ്ധതികള് ലക്ഷ്യം കണ്ടു. പിറ്റേ അഞ്ചുവര്ഷം ബിജെപിയ്ക്ക് 300 എംപിമാര് ഉണ്ടായതിനു കാരണം ഇതാണ്. അതില് 18 പേര് ബംഗാളില് നിന്നാണെന്നും പറഞ്ഞു. തൃണമൂല് കോണ്ഗ്രസിന്റെ 'ദീദിയോട് പറയാം ' എന്ന പ്രചരണ വാചകത്തിന് മറുപടിയായി 'ഇനി കൂടുതല് തെറ്റുകള് വേണ്ട' എന്നൊരു പ്രചരണത്തിന് തുടക്കമിടുകയും ചെയ്തു. അടുത്ത ബംഗാള് സര്ക്കാരിനെ നയിക്കുക ബിജെപിയാകും.
2014 ല് വെറും 87 ലക്ഷം വോട്ടുകള് മാത്രം കിട്ടിയ സ്ഥാനത്താണ് 2019 ലോക്സഭാ തെരഞ്ഞെടുപ്പില് 2.3 കോടി വോട്ടുകള് കിട്ടിയത്. മുഖ്യമന്ത്രി ഈ മണ്ണിന്റെ മകനായിരിക്കും. അത് തൃണമൂലിന്റെ കുടുംബവാഴ്ചയല്ല. കോണ്ഗ്രസിനെതിരേ ബിജെപി നടത്തിയ കുടുംബവാഴ്ച ആക്ഷേപം അമിത്ഷാ തൃണമൂല് കോണ്ഗ്രസിനെതിരേയും നടത്തി. തൃണമൂലില് ഒന്നുകില് മമതാ ബാനര്ജി മുഖ്യമന്ത്രിയാകും അല്ലെങ്കില് പാര്ട്ടിയിലെ രണ്ടാമന് അഭിഷേക് ബാനര്ജി വരുമെന്ന് ഷാ പറഞ്ഞു.
ആരുടെയെങ്കിലും പൗരത്വത്തെ എടുത്തു കളയാന് ഉള്ളതല്ല സിഎഎ. ക്രൂരമായ പീഡനത്തിന് ഇരയായി നിര്ബ്ബന്ധിത മതപരിവര്ത്തനത്തിന് വിധേയരായി യുവതികള് അപമാനിക്കപ്പെട്ട് ഗുരുദ്വാരകളും ക്ഷേത്രങ്ങളും തകര്ക്കപ്പെട്ട് സര്വസ്വവും നഷ്ടപ്പെട്ട് ഇന്ത്യയിലേക്ക് വന്ന് കോടാനുകോടി സഹോദരങ്ങള് ഇന്ത്യയിലേക്ക് വന്നിട്ടുണ്ട്. അവര്ക്ക് ഒരിടത്തും പൗരത്വമില്ലെന്ന് അമിത്ഷാ പറഞ്ഞു. അയോദ്ധ്യയില് രാമക്ഷേത്ര നിര്മ്മാണത്തിന് വലിയ സ്വീകാര്യതയാണ് കിട്ടിയതെന്നും മോഡി രാജ്യത്തിന്റെ സുരക്ഷയ്ക്ക് വേണ്ടിയാണ് ജോലി ചെയ്യുന്നതെന്നും പറഞ്ഞു.
ശ്യാമപ്രസാദ് മുഖര്ജി സ്വപ്നം കണ്ടത് പോലെ കശ്മീരിനെ ഇന്ത്യയുടെ അവിഭാജ്യ ഘടകമാക്കി. അടുത്ത പ്രശ്നം രാമക്ഷേത്ര നിര്മ്മാണമാണ്. ഇക്കാര്യത്തില് മോഡിജി അടിത്തറ ഇട്ടു കഴിഞ്ഞു. അഞ്ചു വര്ഷത്തില് മോഡി ശ്രദ്ധ വെച്ചിരിക്കുന്നത് വികസനത്തിനാണെന്നും പറഞ്ഞു.
